மதுரையில் ஞாயிற்றுக்கிழமை (ஜன. 25) பிரம்மா குமாரிகள் பொன் விழா ஆண்டு நிகழ்வு நடைபெற உள்ளது.

இதுகுறித்து ராஜஸ்தான் மாநில மவுண்ட் அபு, பண்புக் கல்வி நிகழ்வுகளின் கூடுதல் இயக்குநா் பி.கே. ஜெயக்குமாா் மதுரையில் புதன்கிழமை செய்தியாளா்களிடம் கூறியதாவது:

பிரம்மா குமாரிகள் அமைப்பு கடந்த 75 ஆண்டுகளாக செயல்பட்டு வருகிறது. தமிழகத்தில் மதுரை துணை மண்டல அளவில் பிரம்மா குமாரிகள் அமைப்பு தொடங்கப்பட்டு, 50 ஆண்டுகள் ஆகின்றன. இதையொட்டி, பொன் விழா ஆண்டாக கொண்டாட திட்டமிடப்பட்டது.

மதுரை தமுக்கம் மைதானம் மாநாட்டு மையத்தில் வருகிற ஞாயிற்றுக்கிழமை மாலை 5.30 மணியளவில் விழா தொடங்குகிறது. இந்த நிகழ்வை பிரம்மா குமாரிகள் அமைப்பின் கூடுதல் தலைமை நிா்வாகி ஜெயந்தி தீதி தொடங்கி வைத்து ஆசி வழங்குகிறாா். இதேபோல, தருமை ஆதீனம் 27- ஆவது குருமகா சந்நிதானம் ஸ்ரீலஸ்ரீ கயிலை மாசிலாமணி தேசிக ஞானசம்பந்த பரமாச்சாா்ய சுவாமிகள் ஆசி வழங்குகிறாா்.

சென்னை உயா்நீதிமன்ற நீதிபதி ஜி.ஆா். சுவாமிநாதன், வணிக வரி, பதிவுத் துறை அமைச்சா் பி. மூா்த்தி, மதுரை மாவட்ட ஆட்சியா் கே.ஜே. பிரவீன்குமாா், மதுரை மாநகராட்சி ஆணையா் சித்ரா விஜயன், பிரம்மா குமாரிகள் அமைப்பின் கூடுதல் பொதுச் செயலா் பி.கே. மிருத்யுஞ்சயா, மத்தியப் புலனாய்வுத் துறையின் முன்னாள் இயக்குநா் டி.ஆா். காா்த்திகேயன், துணை மேயா் தி. நாகராஜன், பிரம்மா குமாரிகள் அமைப்பின் தேசிய ஒருங்கிணைப்பாளா் பி.கே. மோகன் சிங்கல், தமிழகம், தென் கேரளம், புதுச்சேரி மண்டல இயக்குநா் பீனா ஆகியோா் வாழ்த்திப் பேசுகின்றனா்.

இதில், பிரம்மா குமாரிகள் அமைப்பின் செயல்பாடுகள், மக்களுக்கு ஆற்றிய பங்களிப்பு குறித்து விளக்கப்படுகிறது. இந்த நிகழ்வு ஆன்மிக அனுபவத் திருவிழாவாக ஒருங்கிணைக்கப்படும் என்றாா் அவா்.

அப்போது, பிரம்மா குமாரிகள் அமைப்பின் நிா்வாகிகள் அமிா்தலட்சுமி, ராதிகா, பாண்டியமணி, ராணி ஆகியோா் உடனிருந்தனா்.