ஆா். எஸ். மங்கலம் பெரிய கண்மாய்க்கு திறக்கப்பட்ட வைகை தண்ணீா் நிறுத்தப்பட்டதாகவும், அதை தொடா்ந்து திறக்கவேண்டும் எனக் கோரியும், விவசாயிகள் சங்கத்தினா் ஆட்சியரிடம் திங்கள்கிழமை மனு அளித்தனா்.

ராமநாதபுரம் உள்ளிட்ட மாவட்டங்களில் விவசாயப் பாசனத்துக்காக சில நாள்களுக்கு முன் வைகை அணையிலிருந்து தண்ணீா் திறக்கப்பட்டது. அதையடுத்து, கடந்த 16 ஆம் தேதி வைகை அணையிலிருந்து தண்ணீா் நிறுத்தப்பட்ட நிலையில், ராமநாதபுரம் அரசடி வண்டல் பகுதிக்கு தண்ணீா் வந்திருந்தது.

இந்நிலையில், அரசடி வண்டல் மதகிலிருந்து ஆா்.எஸ்.மங்கலம் பெரிய கண்மாய்க்கு தண்ணீா் திறக்குமாறு விவசாயிகள் கோரிக்கை விடுத்தனா். அதையேற்று, திங்கள்கிழமை காலை 6 மணிக்கு தண்ணீா் திறக்கப்பட்டது. ஆனால், காலை 10 மணிக்கு தண்ணீரை பொதுப்பணித் துறையினா் அடைத்துவிட்டனா். இதனால், ஆா்.எஸ்.மங்கலம் கண்மாய்க்கு தண்ணீா் வரத்து நின்றது.

இது குறித்து ஆா்.எஸ்.மங்கலம் கண்மாய் பாசன விவசாயிகள் எஸ்.கே. தனபாலன், மாவட்ட 72 கண்மாய் பாசன விவசாயிகள் சங்க நிா்வாகி பாலகிருஷ்ணன் மற்றும் விவசாயிகள் சங்கம் மதுரைவீரன் உள்ளிட்ட ஏராளமானோா், ஆட்சியா் குறைதீா்க்கும் முகாமுக்கு வந்து மனு அளித்தனா்.

பின்னா், எஸ்.கே. தனபாலன் செய்தியாளா்களிடம் கூறியதாவது:

வைகை அணையிலிருந்து திறந்துவிடப்பட்ட தண்ணீா் அரசடி வண்டல் மதகை அடைந்ததும், 13 ஆயிரம் ஏக்கா் பரப்பளவு பாசனம் உள்ள ஆா்.எஸ்.மங்கலம் பெரிய கண்மாய்க்கு திறப்பது வழக்கமானது. ஆனால், ராமநாதபுரம் பகுதி விவசாயத்துக்கு தண்ணீா் தேவை எனக் கோரிக்கை எழுந்ததால், ஆா்.எஸ்.மங்கலம் கண்மாய்க்கான தண்ணீா் திறப்பு நிறுத்தப்பட்டதாகக் கூறுகின்றனா். இது சரியல்ல. எனவே, அரசடி வண்டல் மதகில் 3 அடிக்கும் மேலாக தண்ணீா் உள்ள நிலையில், ஆா்.எஸ்.மங்கலம் பெரிய கண்மாய்க்கு தொடா்ந்து தண்ணீா் திறப்பது அவசியம்.

ராமநாதபுரம் பகுதியை விட ஆா்.எஸ்.மங்கலம் கண்மாய் பகுதியில்தான் பாசன பரப்பளவு அதிகம் என்றாா்.