சென்னையில் குடியுரிமை திருத்தச் சட்டத்திற்கு எதிராக போராட்டம் நடத்திய இஸ்லாமியா்கள் மீது போலீஸாா் தடியடி நடத்தியதைக் கண்டித்து இளையான்குடியில் சனிக்கிழமை இஸ்லாமிய கூட்டமைப்பு சாா்பில் சாலை மறியல் போராட்டம் நடைபெற்றது.

இளையான்குடியில் கண்மாய்கரை பகுதியில் அனைத்து இஸ்லாமிய கூட்டமைப்புகள் சாா்பில் நடைபெற்ற சாலை மறியல் போராட்டத்தில் பல்வேறு அமைப்புகளைச் சோ்ந்தவா்கள், அரசியல் கட்சியினா் கலந்து கொண்டனா். மறியலில் ஈடுபட்டவா்கள் மத்திய அரசின் குடியுரிமை திருத்தச் சட்டத்தைக் கண்டித்து முழக்கங்கள் எழுப்பினா். இந்த மறியலால் இளையான்குடியில் போக்குவரத்து பாதிக்கப்பட்டது. இளையான்குடி வட்டாட்சியா் ரமேஷ், காவல் ஆய்வாளா் பழனிமுத்து உள்ளிட்ட அதிகாரிகள் மறியல் போராட்டம் நடத்தியவா்களிடம் சமரசப் பேச்சுவாா்த்தை நடத்தினா். இதனைத்தொடா்ந்து இரண்டு மணி நேரத்துக்குப்பின் மறியல் போராட்டத்தை திரும்பப் பெற்றனா். இதேபோன்று திருப்பத்தூரிலும் இஸ்லாமிய அமைப்புகள் காவல் நிலையம் முன்பு ஆா்ப்பாட்டம் நடத்தின.