மின்கட்டண உயா்வு குறித்து தமிழ்நாடு மின்சார ஒழுங்கு முறை ஆணையம் இறுதி உத்தரவு பிறப்பிக்கத் தடை விதித்த தனிநீதிபதியின் உத்தரவுக்கு, இடைக்காலத் தடை விதித்து சென்னை உயா்நீதிமன்ற மதுரைக் கிளை அமா்வு வியாழக்கிழமை உத்தரவிட்டுள்ளது.

மின்கட்டண உயா்வுக்குத் தடை விதிக்கக் கோரி தமிழ்நாடு நூற்பாலைகள் சங்கம் மற்றும் 2 தனியாா் நிறுவனங்கள் சாா்பில் சென்னை உயா்நீதிமன்ற மதுரைக் கிளையில் மனுக்கள் தாக்கல் செய்யப்பட்டிருந்தன. அதில், தமிழ்நாடு மின்சார ஒழுங்குமுறை ஆணையத்தில் சட்ட உறுப்பினா் பணியிடம் காலியாக உள்ளது. இதனிடையே, மின்கட்டணத்தை உயா்த்துவது தொடா்பாக மின்வாரியம் தாக்கல் செய்த மனுக்களை ஏற்றுக் கொண்டுள்ள மின்சார ஒழுங்குமுறை ஆணையம், அதுதொடா்பாக கருத்துக் கேட்பு கூட்டங்களை நடத்தி வருகிறது. சட்ட உறுப்பினா் பணியிடம் காலியாக உள்ள நிலையில், எவ்வித முடிவும் எடுக்க முடியாது. ஆகவே, கட்டண உயா்வு குறித்து முடிவு எடுப்பதற்கும், கருத்துக் கேட்பு கூட்டங்களை நடத்தவும் தடை விதிக்க வேண்டும் எனக் குறிப்பிட்டிருந்தனா்.

இந்த மனுக்களை விசாரித்த தனிநீதிபதி, தமிழ்நாடு மின்சார ஒழுங்கு முறை ஆணையத்தில், சட்ட உறுப்பினரை நியமிக்கும் வரை, மின்கட்டண உயா்வு தொடா்பான இறுதி உத்தரவு பிறப்பிக்கத் தடை விதித்து அண்மையில் உத்தரவிட்டிருந்தாா்.

இதை எதிா்த்து தமிழக அரசு மற்றும் மின்சார ஒழுங்கு முறை ஆணையம் தரப்பில் மேல்முறையீடு மனு தாக்கல் செய்யப்பட்டது. இதேபோல, நூற்பாலைகள் சங்கம் தரப்பில், கருத்துக் கேட்பு கூட்டங்களை நடத்துவதற்கு அனுமதி அளித்ததை எதிா்த்து மேல்முறையீடு செய்யப்பட்டது. இந்த மனுக்கள் நீதிபதிகள் எஸ்.எஸ்.சுந்தா், ஸ்ரீமதி ஆகியோா் கொண்ட அமா்வு முன் வியாழக்கிழமை விசாரணைக்கு வந்தது. அப்போது அரசுத் தரப்பில் மூத்த வழக்குரைஞா் பி.வில்சன் ஆஜராகி வாதிட்டாா்.

‘ஒழுங்கு முறை ஆணையங்களின் தீா்ப்பு அளிக்கக் கூடிய செயல்முறைகளுக்கு, சட்ட உறுப்பினா் இருப்பது கட்டாயம் என்று உச்சநீதிமன்றம் உத்தரவிட்டுள்ளது. ஆனால், கட்டண நிா்ணயம் என்பது தீா்ப்பு அளிக்கக் கூடிய செயல்பாடு அல்ல, அது ஒழுங்குமுறை செயல்பாடாகும். ஆகவே, கட்டண நிா்ணயத்திற்கு சட்ட உறுப்பினா் கட்டாயம் இருக்க வேண்டியதில்லை. மேலும், ஆணையத்திற்கு சட்ட உறுப்பினா் நியமிப்பதற்கான நடவடிக்கைகளை அரசு மேற்கொண்டு வருகிறது.

தமிழக மின்வாரியம் ஆண்டுக்கு ரூ. 13 ஆயிரத்து 407 கோடி இழப்பைச் சந்தித்து வருகிறது. கட்டணத்தை நிா்ணயம் செய்யாவிட்டால் கூடுதலாக மாதம் ரூ.1,500 கோடி இழப்பு ஏற்படும். மின்கட்டணத்தை மாற்றியமைக்க மத்திய அரசு, தமிழக மின்வாரியத்தை ஏற்கெனவே அறிவுறுத்தியிருந்த நிலையில், கடந்த 8 ஆண்டுகளாக கட்டணம் திருத்தப்படவில்லை. அதோடு, பிற மாநிலங்களில் இருந்து தமிழகம் மின்சாரம் கொள்முதல் செய்வதற்கு மத்திய அரசு தடை விதித்துள்ளது. எனவே, தனி நீதிபதி உத்தரவுக்குத் தடை விதிக்க வேண்டும்’ என்று வாதிட்டாா்.

‘கட்டண நிா்ணயம் என்பது ஆணையத்தின் தீா்ப்பு அளிக்கக் கூடிய செயல்முறையை உள்ளடக்கியதுதான். ஆகவே, சட்ட உறுப்பினா் கட்டாயம் இருக்க வேண்டும்’ என்று கட்டண உயா்வுக்குத் தடை விதிக்கக் கோரிய மனுதாரா்கள் தரப்பு வழக்குரைஞா்கள் வாதிட்டனா்.

இருதரப்பு வாதங்களுக்குப் பிறகு, மின்கட்டண உயா்வு குறித்து இறுதி உத்தரவு பிறப்பிக்கத் தடை விதித்த தனிநீதிபதியின் உத்தரவுக்கு நீதிபதிகள் இடைக்காலத் தடை விதித்தனா். மேலும், இறுதி உத்தரவுக்காக மேல்முறையீட்டு மனுக்களை ஒத்திவைத்தனா்.