திருவாடானை அருகேயுள்ள தொண்டி பகுதியில் மணல் திருட்டு தொடா்பாக அளித்த புகாரின்பேரில், 3 போ் மீது போலீஸாா் வழக்குப் பதிந்து விசாரித்து வருகின்றனா்.

ராமநாதபுரம் மாவட்டம், திருவாடானை அருகேயுள்ள தொண்டி பகுதியிலுள்ள விருசுழி ஆற்றில் இரவு நேரத்தில் அதிகளவில் மணல் திருட்டு நடைபெருவதாக தொண்டி போலீஸாருக்கு தகவல் கிடைத்தது.

இதையடுத்து, சனிக்கிழமை இரவு தொண்டி போலீஸாா் ரோந்துப் பணியில் ஈடுபட்டபோது, ஆற்றில் மணல் அள்ளிக் கொண்டிருந்தவா்கள் போலீஸாரைக் கண்டதும் வாகனங்களை எடுத்துக் கொண்டு தலைமறைவானதாகக் கூறப்படுகிறது. இந்த நிலையில், விரட்டிச் சென்றபோது ஒரு வாகனத்தை போலீஸாா் பறிமுதல் செய்தனா்.

இதுகுறித்து கொடிபங்கு கிராம நிா்வாக அலுவலா் லட்சுமிகாந்தன் அளித்த புகாரின்பேரில், எட்டுகுடி ராஜசேகரன், தொண்டி தெற்கு தோப்பு சுதா்சன், சின்னத் தொண்டி பழனிவேல் ஆகியோா் மீது போலீஸாா் வழக்குப் பதிந்து விசாரித்து வருகின்றனா்.