சண்முகாநதி நீா்த்தேக்கத்தில் பாசனத்துக்கு தண்ணீா் திறக்க விவசாயிகள் கோரிக்கை

தேனி மாவட்டத்தில் தொடா் மழையால் சண்முகாநதி நீா்த்தேக்கம் முழு கொள்ளளவை எட்டியுள்ள நிலையில், அங்கிருந்து விரைவில் பாசனத்துக்கு தண்ணீா் திறக்க வேண்டும் என்று விவசாயிகள் கோரிக்கை விடுத்துள்ளனா்.

உத்தமபாளையம் அருகே மேகமலை அடிவாரத்தில் உள்ள சண்முகாநதியின் குறுக்கே கட்டப்பட்டுள்ள சண்முகாநதி நீா்த்தேக்கம் தொடா் மழை காரணமாக நவ. 20-ஆம் தேதி முழு கொள்ளளவை எட்டியது. கடந்த அக். 28-ஆம் தேதி முதல் தற்போது வரை நீா்த்தேக்கத்துக்கு தொடா்ந்து நீா்வரத்து இருந்தும், பாசனத்துக்கு தண்ணீா் திறக்கப்பட வில்லை.

இதனால், விவசாயிகள் கவலையடைந்துள்ளனா். இதனிடையே சண்முகாநதி நீா்த்தேக்கத்தின் பாசனக் கால்வாயை தூா்வாரி, விரைவில் பாசனத்துக்கு தண்ணீா் திறக்க வேண்டும் என அவா்கள் வலியுறுத்தியுள்ளனா்.

பொதுப் பணித்துறை பாராமுகம்: உத்தமபாளையம் பொதுப் பணித்துறை கட்டுப்பாட்டில் உள்ள சண்முகாநதி நீா்தேக்கத்தை பாதுகாத்து பராமரிக்கவும், உரிய காலத்தில் பாசனத்துக்கு தண்ணீா் திறக்கவும் அதிகாரிகள் ஆா்வம் காட்டவில்லை என்று விவசாயிகள் புகாா் தெரிவித்துள்ளனா்.

கடந்த 10 ஆண்டுகளுக்கும் மேல் தனியாா் பண்ணை விவசாயத்துக்கு மட்டும் பயன்பட்டு வரும் சண்முகநதி நீா்த்தேக்கத்துக்கு, பொதுப் பணித்துறை சாா்பில் தனி பொறியாளாரை நியமிக்க வேண்டும்.

நீா்வரத்து ஓடை மற்றும் நீா்பிடிப்பு பகுதிகளில் நடைபெறும் விவசாய ஆக்கிரமிப்பு, மணல் மற்றும் தண்ணீா் திருட்டு ஆகியவற்றை தடுக்கவும், பாசனக் கால்வாயை தூா்வாரி பயன்பாட்டுக்கு கொண்டு வரவும், தண்ணீா் திறப்பை முறைப்படுத்தவும் மாவட்ட நிா்வாகம் நடவடிக்கை எடுக்க வேண்டும் என்று விவசாயிகள் கோரிக்கை விடுத்துள்ளனா்.