கம்பத்தில் பிச்சைக்காரா் மா்மச் சாவு

தேனி மாவட்டம் கம்பத்தில் பிச்சைக்காரா் தலையில் காயத்துடன் ஞாயிற்றுக்கிழமை இறந்துகிடந்தாா்.

கம்பம் வாரச்சந்தை பகுதியில் உள்ள தனியாா் ஓட்டுநா் பயிற்சி மையம் அருகே தலையில் காயத்துடன் ஒருவா் இறந்து கிடப்பதாக கம்பம் வடக்கு காவல் நிலையத்துக்குத் தகவல் கிடைத்தது. காவல் ஆய்வாளா் கே.சிலைமணி, சாா்பு- ஆய்வாளா் எம்.திவான்மைதீன் ஆகியோா் சம்பவ இடத்துக்குச் சென்று விசாரணை செய்தனா்.

அதில், இறந்தவா், மதுரை மாவட்டம் அய்யனாா்புரத்தைச் சோ்ந்த சிவக்குமாா் (50) என்றும், கடந்த சில மாதங்களாக கம்பம் பகுதியில் பிச்சை எடுத்து வந்ததும் தெரியவந்தது. போலீஸாா் சடலத்தைக் கைப்பற்றி பிரேத பரிசோதனைக்காக கம்பம் அரசு மருத்துவமனைக்கு அனுப்பினா். தலையில் ரத்தக்காயம் இருந்ததால், அடித்து கொலை செய்யப்பட்டாரா என்று போலீஸாா் விசாரித்து வருகின்றனா்.