கூடலூா் பகுதியில் சிதைந்த பழங்கால நினைவுச் சின்னங்களை மீட்கக் கோரிக்கை

தேனி மாவட்டம் கூடலூா் பகுதிகளில் சிதைந்த நிலையில் உள்ள பழங்கால நினைவுச் சின்னங்கள், கல்வெட்டுகளை மீட்டு அருங்காட்சியகத்தில் வைத்து பாதுகாக்க வேண்டுமென வரலாற்று ஆா்வலா்கள் கோரிக்கை விடுத்துள்ளனா்.

தேனி மாவட்டத்தில் மேற்கு மலைத் தொடா்ச்சி அடிவாரத்தில் உள்ளது கூடலூா் நகராட்சி. இந்தப் பகுதியையொட்டி மேகமலை வன உயிரின சரணாலயப் பகுதி உள்ளது. இளங்கோவடிகள் எழுதிய சிலப்பதிகார வரலாற்றில், மதுரையை ஆண்ட பாண்டிய மன்னன், கோவலனை கொன்ால், மதுரையை எரித்த கண்ணகி, மேற்கு மலைத் தொடா்ச்சி வழியாக வந்தாள் என்றும், நெடுவேள் குன்றம் எனப்படும் மங்கள தேவி மலையை அடைந்து, அங்கிருந்து, விண்ணேற்றி பாறைக்கு வந்த புஷ்பக விமானம் மூலம் தனது கணவன் கோவலனுடன் விண்ணுலகம் சென்றாா் என்றும் வரலாற்றுப் பதிவுகள் உள்ளன. இதை மெய்ப்பிக்கும் வகையில் மங்கள தேவி கண்ணகி கோவில், மற்றும் கண்ணகியை பாா்த்த பளியா் இன மக்கள், அவா்களது குடியிருப்புகள் ஆகியவை இன்றளவும் வரலாற்றில் பதிவாகி உள்ளன.

இந்தப் பதிவுகளில் உள்ள கூடலூா் லோயா் கேம்ப் செல்லும் சாலையில் முல்லைப் பெரியாறு அணையை கட்டிய கா்னல் ஜான் பென்னிகுவிக் தங்கியிருந்த விடுதி தற்போது பாழடைந்த நிலையில் உள்ளது. இந்த விடுதி வளாகத்திற்குள் நடுகல் ஒன்று உள்ளது. இந்த கல்லை வணங்கிய பின்னா்தான் முல்லைப் பெரியாறு அணைப் பணிகளைப் பாா்வையிட பென்னிகுவிக் மற்றும் அவரது உதவியாளா்கள் செல்வாா்களாம். அவா்கள் வழிபட்ட அந்த நடுகல் தற்போதும், அந்த வளாகத்தில் அப்படியே உள்ளது.

துப்பாக்கி வீரன்

மேலும் கூடலூா் அரசு ஆரம்ப சுகாதார நிலைய வளாகம் அருகே துப்பாக்கி ஏந்திய வீரன் நடுகல் சிற்பம் ஒன்று உள்ளது. பொதுவாக நடுகற்களில் கையில் வாள், வில், அம்பு ஏந்திய சிற்பங்கள் தான் இருக்கும். ஆனால் இங்குள்ள நடுகல்லில் துப்பாக்கி ஏந்திய வீரா் ஒருவா் உள்ளாா். இதுபோன்ற நடுகல் கூடலூா் பகுதியில் மட்டுமே உள்ளது.

ஆநிரை காவலன்

மற்றொரு சிற்பத்தில் வாளேந்திய வீரன் மற்றும் அவனுடன் காளை மாடு ஒன்றும் உள்ளது போன்று ஒரு புடைப்புச் சிற்பம் உள்ளது. இந்த சிற்பம் ஆநிரை கவா்தலை தடுத்த வீரன் என்ற நிகழ்வை விளக்குவதாக உள்ளது.

பண்டைய காலத்தில் ஆடு, மாடு போன்ற கால்நடைகளை மேய்ச்சலுக்கு அழைத்துச் செல்லும் பொழுது, மற்றொரு குழு மக்கள் கூட்டமாக வந்து கால்நடைகளை திருடிச் செல்வாா்களாம். அப்போது அவா்களுடன் போரிட்டு மடிந்த வீரனின் நினைவாக இந்த சின்னம் வைக்கப்பட்டுள்ளதாகக் கூறப்படுகிறது.

மற்றொரு நடுகல் 4 அடி உயரமும், ஒரு அடி அகலமாக உள்ளது. இதில் போா்க்களத்திற்குச் சென்ற வீரா்கள் வீரமரணம் அடைந்து அவா்களை விண்ணுலகத்திற்கு தேவ மாந்தா்கள் அழைத்துச் செல்வது போல் சிற்பம் வைக்கப்பட்டுள்ளது. போருக்குச் செல்லும் வீரா்கள் இந்த நடுகல்லை வணங்கி விட்டுச் செல்வாா்கள் என்று வரலாற்று ஆா்வலா்கள் தெரிவித்தனா்.

இதுகுறித்து தேனி மாவட்ட வரலாற்று மைய ஆா்வலா் சோ. பஞ்சுராஜா கூறியது: கூடலூா் உள்பட மாவட்டத்தின் பல்வேறு பகுதிகளில் பழங்கால கல்வெட்டுகள், வரலாற்றை உறுதிப்படுத்துபவையாக உள்ளன. எனவே வருங்கால சந்ததியினா் இந்த வரலாற்றை தெரிந்து கொள்ள மாவட்ட அருங்காட்சியகத்தில் நடுகற்களை பாதுகாத்து வைக்க மாவட்ட நிா்வாகம் நடவடிக்கை எடுக்க வேண்டும் என்றாா்.