பெரியகுளத்தில் நகராட்சி நிா்வாக ஆணையா் ஆய்வு: பேருந்து நிலையத்தை இடமாற்ற அதிமுகவினா் மனு

பெரியகுளம் நகராட்சிப் பகுதியில் சனிக்கிழமை ஆய்வு செய்த நகராட்சி நிா்வாக ஆணையரிம் புதிய பேருந்து நிலையத்தை வெறு இடத்துக்கு மாற்றக்கோரி அதிமுகவினா் மனு அளித்தனா்.

பெரியகுளம் நகராட்சி பகுதியில் நடைபெற்று வரும் வளா்ச்சித் திட்டப்பணிகளை நகராட்சி நிா்வாக ஆணையா் பொன்னையா சனிக்கிழமை ஆய்வு செய்தாா். பெரியகுளம் பேருந்து நிலையம் மற்றும் குப்பைகளிலிருந்து உரம் தயாரிக்கும் மையம் மற்றும் வளா்ச்சித் திட்டப் பணிகளை பாா்வையிட்டு அவா் ஆய்வு செய்தாா். ஆய்வின்போது பெரியகுளம் நகராட்சி ஆணையாளா் புனிதன், நகராட்சித் தலைவா் சுமிதா ஆகியோா் உடனிருந்தனா்.

பெரியகுளம் நகராட்சிக்கு உள்பட்ட பகுதியில் அமைந்துள்ள புதிய பேருந்து நிலையத்திற்கு பேருந்துகள் வந்து செல்ல வசதியில்லாததால், பயணிகள் பாதிப்படைகின்றனா். எனவே பேருந்து நிலையத்தை அரசு போக்குவரத்துக் கழக பெரியகுளம் கிளை அலுவலகத்திற்கும் அரசு போக்குவரத்துக்கழக அலுவலகத்தை புதிய பேருந்துநிலையத்திற்கும் மாற்ற வேண்டும். பழைய பேருந்து நிலையத்தை ஆம்னி பேருந்து நிலையமாக மாற்ற நடவடிக்கை எடுகக் வேண்டும் என அதிமுக நகராட்சி கவுன்சிலா்கள் குழுத்தலைவா் ஓ.சண்முக சுந்தரம் கோரிக்கை மனுவை நகராட்சி நிா்வாக ஆணையரிடம் வழங்கினாா்.