வீரபாண்டி சித்திரை திருவிழா: மே 10-ஆம் தேதி முதல் வாகனப் போக்குவரத்தில் மாற்றம்

வீரபாண்டி கெளமாரியம்மன் கோயில் சித்திரை திருவிழாவை முன்னிட்டு தேனி-கம்பம் ஆகிய ஊா்களுக்கு இடையே மே 10-ஆம் தேதி முதல் 17-ஆம் தேதி வரை மாற்றுப் பாதையில் வாகனப் போக்குவரத்து அனுமதிக்கப்படும் என்று தெரிவிக்கப்பட்டுள்ளது.

வீரபாண்டி கெளமாரியம்மன் கோயில் சித்திரை திருவிழா கடந்த ஏப்.20-ஆம் தேதி தொடங்கி நடைபெற்று வருகிறது. திருவிழாவின் முக்கிய நிகழ்ச்சிகள் மே 10-ஆம் தேதி முதல் 17-ஆம் தேதி வரை நடைபெறுகிறது. அப்போது, வீரபாண்டிக்கு சென்று வரும் பக்தா்கள் கூட்டம் அதிகரிக்கும் என்பதால், தேனி- கம்பம் ஆகிய ஊா்களுக்கு இடையே மாற்றுப் பாதையில் வாகனப் போக்குவரத்து அனுமதிக்கப்படுகிறது.

இதுகுறித்து மாவட்டக் காவல் கண்காணிப்பாளா் பிரவீன் உமேஷ் டோங்கரே வெள்ளிக்கிழமை, கூறியது: மே 10-ஆம் தேதி காலை 6 மணி முதல் மே 17-ஆம் தேதி நள்ளிரவு 12 மணி வரை தேனியிலிருந்து கம்பம் பகுதிக்குச் செல்லும் பேருந்து மற்றும் கன ரக வாகனங்கள் உப்புக்கோட்டை விலக்கிலிருந்து குச்சனூா், மாா்க்கையன்கோட்டை, சின்னமனூா் அல்லது உத்தமபாளையம் வழியாகவும், கம்பத்திலிருந்து தேனிக்குச் செல்லும் பேருந்து மற்றும் கனரக வாகனங்கள் உப்பாா்பட்டி விலக்கு பகுதியிலிருந்து தாடிச்சேரி, கொடுவிலாா்பட்டி, அரண்மனைப்புதூா் வழியாகவும் செல்ல வேண்டும்.

சித்திரை திருவிழாவை முன்னிட்டு மே 10-ஆம் தேதி முதல் 17-ஆம் தேதி வரை மாவட்டத்தில் பல்வேறு பகுதிகளிலிருந்தும் வீரபாண்டிக்கு அரசு போக்குவரத்துக் கழகம் சாா்பில் சிறப்பு பேருந்துகள் இயக்கப்படும். வீரபாண்டியில் கம்பம் சாலை மற்றும் தேனி சாலையில் தற்காலிக பேருந்து நிறுத்தம் செயல்படும் என்றாா்.