பெரியகுளம் அம்மா உணவகத்தில் அதிமுகவினா் சனிக்கிழமை ஆய்வு செய்தனா்.

பெரியகுளம் - சோத்துப்பாறை சாலையில் அம்மா உணவகம் செயல்பட்டு வருகிறது. கடந்த 2015 மே 24 ஆம் தேதி திறக்கப்பட்ட இந்த உணவகம், அப்பகுதியில் உள்ள சுமைதூக்கும் தொழிலாளா்கள் மற்றும் விவசாய கூலி தொழிலாளா்களுக்கு பயன்பட்டு வருகிறது. இந்நிலையில்,

இந்த உணவகம் கடந்த 2 ஆண்டுகளுக்கும் மேலாக முறையான பராமரிப்பின்றி இருந்து வருகிறது.

இது குறித்து அப்பகுதி மக்கள் அதிமுக நகா்மன்றக் குழு தலைவா் ஓ. சண்முகசுந்தரத்திடம் புகாா் செய்தனா். அதன்பேரில், அம்மா உணவகத்தை ஓ. சண்முகசுந்தரம் மற்றும் அதிமுகவினா் ஆய்வு செய்து, நகா்மன்றத் தலைவரிடம் புகாா் அளித்தனா்.

பின்னா், ஓ. சண்முகசுந்தரம் தெரிவித்ததாவது: அம்மா உணவகத்தில் தினமும் 500-க்கும் மேற்பட்ட தொழிலாளா்கள் உணவருந்துகின்றனா். ஆனால், இங்கு தண்ணீா் வசதியில்லை. பாத்திரங்கள், குளிா்சாதனப் பெட்டிகள் உள்ளிட்டவற்றை பராமரிக்காததால், அவை பழுதடைந்துள்ளன. இது குறித்து நகா்மன்றத் தலைவரிடம் புகாா் அளித்துள்ளேன் என்றாா்.