மலைக் கிராம இணைப்புச் சாலை அமைக்கக் கோரிக்கை

தேனி: பெரியகுளம் அருகே சொக்கனலை- கன்னக்கரை மலை கிராமங்களுக்கு இடையே சாலை அமைத்துத் தரக் கோரி தேனி மாவட்ட ஆட்சியா் அலுவலகத்தில் பொதுமக்கள் திங்கள்கிழமை மனு அளித்தனா்.

தேனி மாவட்ட ஆட்சியா் அலுவலகத்தில் நடைபெற்ற மக்கள் குறைதீா் கூட்டத்தில் சொக்கனலை கிராமத் தலைவா் செல்வம், வனக் குழு தலைவா் கண்ணன் மற்றும் பொதுமக்கள், மாவட்ட ஆட்சியரிடம் அளித்த மனு விவரம்:

சொக்கனலை மலைக் கிராமத்தில் 50 குடும்பத்தினா் வசித்து வருகிறோம். இங்கிருந்து பள்ளி, மருத்துவமனைக்கும், பொருள்கள் வாங்கவும் மலைப் பாதையில் 2 கி.மீ. தொலைவுக்கு கண்ணக்கரை வரை நடந்து சென்று, அங்கிருந்து சோத்துப்பாறை சாலை வழியாக பெரியகுளத்துக்குச் சென்று வருகிறோம்.

மலைக் கிராம மக்களின் நலன் கருதி சொக்கனலையிலிருந்து கண்ணக்கரை வரை தடுப்புச் சுவருடன் கூடிய சாலை வசதி செய்து தர வேண்டும் என அதில் குறிப்பிட்டிருந்தனா்.