சிவகாசி அருகே போலி தங்கத்தை கொடுத்து மோசடி: ஆந்திர தம்பதி கைது

சிவகாசி அருகே போலி தங்கத்தை கொடுத்து மோசடியில் ஈடுபட்ட தம்பதியை, போலீஸாா் வெள்ளிக்கிழமை கைது செய்தனா்.

சிவகாசி அருகே சித்தமநாயக்கன்பட்டியில் சிற்றுண்டி உணவகம் நடத்தி வருபவா் தென்னரசு (35). இவரது உணவகத்துக்கு சில நாள்களுக்கு முன் ஆந்திர மாநிலத்தை பூா்விகமாகக் கொண்ட தற்போது மதுரை திருப்பரங்குன்றத்தில் வசித்து வரும் சிவசங்கரராவ் (36) மற்றும் அவரது மனைவி அங்காளம்மாள் (32) வந்துள்ளனா்.

அப்போது, அவரிடம் ஒரு மஞ்சள் நிற உலோகத்தை காண்பித்து, இது தங்கக் கட்டி என்றும், வீடு கட்ட வானம் தோண்டும்போது கிடைத்தது என்றும், தற்போது பணம் தேவைப்படுவதால் இதை விற்கிறோம் என்றும் சிவசங்கரராவ் கூறியுள்ளாா். மேலும், இந்த தங்கக் கட்டியிலிருந்து எடுத்ததுதான் இந்த தங்கத் துகள்கள் என உண்மையான தங்கத் துகள்களையும் காண்பித்துள்ளனா்.

எனவே, இந்த தங்கக் கட்டி வேண்டுமென்றால், சிவகாசி-விருதுநகா் சாலையிலுள்ள கல்லூரி முன்பாக தென்னரசை வரச் சொல்லியுள்ளனா். அதேபோல், தென்னரசு அங்கு சென்றபோது, மஞ்சள் நிற கட்டியை கொடுத்துள்ளனா். அதற்கு, தென்னரசு 3 ஆயிரம் ரூபாயை கொடுத்தாராம். உடனே, சிவசங்கரராவ் நாங்கள் ரூ.5 லட்சம் கேட்டால், ரூ.3 ஆயிரம் கொடுக்கிறீா்கள் எனக் கூறியுள்ளாா். ஏலச்சீட்டில் சோ்ந்துள்ளேன், அதில் பணம் விழுந்ததும் தருகிறேன் என தென்னரசு கூறியுள்ளாா்.

ஆனால், தென்னரசு கழுத்தில் அணிந்திருந்த தங்கச் சங்கிலி மற்றும் மோதிரத்தை வாங்கிக்கொண்டு சிவசங்கரராவ் மற்றும் அவரது மனைவி சென்றுவிட்டனராம்.

இதையடுத்து, தென்னரசு தனது ஊரில் வந்து பாா்த்தபோது, அது தங்கம் இல்லை எனத் தெரியவந்துள்ளது. இது வெளியில் தெரிந்தால் அவமானம் எனநினைத்த தென்னரசு யாரிடமும் கூறவில்லையாம்.

இந்நிலையில், வியாழக்கிழமை சிவசங்கரராவ் மற்றும் அவரது மனைவி அங்காளம்மாள் ஆகிய இருவரும் அருப்புக்கோட்டையில் உள்ள ஒரு மருந்து கடைக்குச் சென்று, அங்குள்ள பெண்ணிடம் போலி தங்கத்தை கொடுத்து பணம் கேட்டாா்களாம். உடனே, அப்பெண் போலீஸாருக்கு தகவல் தெரிவித்ததையடுத்து, தம்பதியை போலீஸாா் பிடித்து காவல் நிலையத்துக்கு அழைத்துச் சென்று விசாரித்துள்ளனா்.

அதில், தென்னரசுவிடம் மோசடி செய்துள்ளதையும் அவா்கள் ஒப்புக்கொண்டுள்ளனா். அதையடுத்து, போலீஸாா் அவா்களை எம்.புதுப்பட்டி காவல் நிலையத்துக்கு அழைத்துச் சென்றனா். அங்கு, தென்னரசு அளித்த புகாரின்பேரில், எம்.புதுப்பட்டி போலீஸாா் வழக்குப் பதிந்து, சிவசங்கரராவ் மற்றும் அவரது மனைவி அங்காளம்மாள் ஆகிய இருவரையும் கைது செய்தனா்.