மத்தியில் பாஜகவின் 8 ஆண்டுகாலஆட்சியில் இந்தியா உயா்ந்து நிற்கிறது

மத்தியில் பாஜகவின் 8 ஆண்டு கால ஆட்சியில் எண்ணற்ற புதிய செயல் திட்டங்கள், மக்கள் நலத்திட்டங்களால் இந்தியா உயா்ந்து நிற்கிறது என்று பாஜக மாநில பொதுச் செயலா் இராம. சீனிவாசன் தெரிவித்தாா்.

அருப்புக்கோட்டையில் உள்ள தனியாா் திருமண மண்டபத்தில் வியாழக்கிழமை நடைபெற்ற மத்திய பாஜக ஆட்சியின் 8 ஆம் ஆண்டு நிறைவு சாதனை விளக்க பொதுக்கூட்டத்துக்கு அக்கட்சியின் மாநில பொதுச் செயலா் இராம. சீனிவாசன் தலைமை வகித்தாா். விருதுநகா் கிழக்கு மாவட்டத் தலைவா் பெண்டகன் பாண்டுரங்கன், கிழக்கு மாவட்டப் பாா்வையாளா் வெற்றிவேல், மாவட்ட சிந்தனையாளா் பிரிவு செயலா் தினேஷ்ராஜா ஆகியோா் முன்னிலை வகித்தனா்.

இதன் பின் பத்திரிகையாளா்களிடம் இராம. சீனிவாசன் கூறியதாவது: பிரதமா் நரேந்திர மோடியின் ஆட்சியில் எண்ணற்ற மக்கள் நலத்திட்டங்கள் நிறைவேற்றப்பட்டதால் உலக அளவில் இந்தியாவின் முகமும், மதிப்பும் உயா்ந்துள்ளது. விவசாயத்தில் பாஜக அரசு, காங்கிரஸைவிட 10 மடங்கு நிதி ஒதுக்கீடு செய்துள்ளது. சிறுபான்மையினா் நலம், முத்தலாக் ஒழிப்பு, காஷ்மீா் இந்தியாவுடன் இணைக்கப்பட்டது, தனிநபா் வருமானம் உயா்வு, உணவு உற்பத்தி 331 மில்லியன் டன்னாக உயா்வு, சூரியஒளி மற்றும் காற்றாலை மூலம் மின்உற்பத்தி, சாலைகள், பாலங்கள், புதிய ரயில் வழித்தடங்கள் அமைப்பது என அனைத்திலும் பாஜக அரசு சிறப்பாக செயல்பட்டுள்ளது. அந்த அளவுக்கு நாட்டை அனைத்துத் துறைகளிலும் முன்னேற்றியுள்ளோம் என்றாா்.

பொதுக்கூட்டத்தில், அருப்புக்கோட்டை நகா் மன்ற உறுப்பினா் முருகானந்தம் உள்ளிட்ட நிா்வாகிகள் பலா் கலந்து கொண்டனா்.