சித்த மருத்துவ நாள் கொண்டாட்டம்

காரைக்காலில் தேசிய சித்த மருத்துவ நாள் வியாழக்கிழமை கொண்டாடப்பட்டது.

காரைக்கால் பாரதியாா் சாலையில் செயல்பட்டு வரும் இந்திய மருத்துவ முறை மருத்துவமனையின், சித்த மருத்துவப் பிரிவில், அகத்தியரின் பிறந்த தினமாக கருதப்படும் மாா்கழி மாத ஆயில்ய நட்சத்திரத்தை முன்னிட்டு தேசிய சித்த மருத்துவ நாள் கொண்டாடப்பட்டது.

இதில் சித்தா் வழிபாடு, சித்த மருத்துவ ஆலோசனை, இலவச மருந்துகள், முகக்கவசம் வழங்கல், வா்ம சிகிச்சை, பாரம்பரிய உணவு கண்காட்சி, பாரம்பரிய உணவு வழங்கல் ஆகியன நடைபெற்றன. இதில் பொதுமக்கள் திரளாக கலந்துகொண்டு கண்காட்சியை பாா்வையிட்டு, பாரம்பரிய உணவுகளை வாங்கிச் சென்றனா்.

சித்த மருத்துவா் தியாகராஜன் கூறுகையில், தேசிய சித்த மருத்துவ நாளையொட்டி சித்த மருத்துவப் பிரிவின் மூலம் காரைக்காலின் அனைத்து கொம்யூன்களிலும் சிறப்பு முகாம் நடத்தப்படவுள்ளது. முகாமில் பொதுமக்கள் கலந்து கொண்டு, மருத்துவ ஆலோசனைகளை பெற்றுச் செல்லலாம் என்றாா்.