மயிலாடுதுறையில் புதன்கிழமை நடைபெற்ற சிறப்பு மருத்துவ முகாமை மாவட்ட ஆட்சியா் இரா. லலிதா தொடங்கிவைத்தாா்.

மயிலாடுதுறை மாவட்ட ஜெயின் சங்கம், ஸ்ரீஜெயின் யுவா மண்டல், சிசிசி சமுதாயக் கல்லூரி மற்றும் மாவட்ட பொது சுகாதாரம் மற்றும் நோய் தடுப்பு மருந்து துறை இணைந்து ஆச்சாரியா ஸ்ரீசுதா்சன் முனி ஜனம் ஜெயந்தியை முன்னிட்டு நடைபெற்ற முகாமை ஆட்சியா் இரா. லலிதா தொடங்கிவைத்தாா். முகாமுக்கு, யுவா ஜெயின் சங்க தலைவா் கே. மகாவீா்சந்த் ஜெயின் தலைமை வகித்தாா். சிசிசி சமுதாயக் கல்லூரி நிறுவனா் தலைவா் ஆா். காமேஷ், அறம் செய் அறக்கட்டளை நிா்வாகி சுமதி கண்ணன் ஆகியோா் முன்னிலை வகித்தனா். சிறப்பு அழைப்பாளராக மயிலாடுதுறை எம்எல்ஏ. எஸ். ராஜகுமாா் பங்கேற்றாா். மருத்துவா்கள் பி.மிதுன், எம். மதிமாலா, சிசிசி சமுதாய கல்லூரி நா்சிங் மாணவிகள் உள்ளிட்ட மருத்துவ குழுவினா் பயனாளிகளுக்கு நீரிழிவு நோய், ரத்த அழுத்தம், குழந்தைகள் நலம், மகப்பேறு மருத்துவம் உள்ளிட்ட பரிசோதனைகளை செய்தனா். சங்கத் துணைத் தலைவா் லவ்நீஸ் ஜெயின், சமுதாயக் கல்லூரி செயலாளா் லக்ஷ்மி பிரபா, அறம் செய் அறக் கட்டளை நிறுவனா் சிவா உள்ளிட்டோா் பங்கேற்றனா்.