நவீன டிவி மூலம் நடமாடும் வகுப்பறை:அரசுப் பள்ளி ஆசிரியரின் புது முயற்சி

மயிலாடுதுறை மாவட்டம், சீா்காழி அருகே சக்கர நாற்காலியில் இணைய வசதியுடன்கூடிய நவீன தொலைக்காட்சிப் பெட்டியை எடுத்துச் சென்று, கிராமப்புற மாணவா்களுக்கு பாடம் நடத்திவருகிறாா் அரசுப் பள்ளி ஆசிரியா் சு. சீனிவாசன்.

கரோனா பொதுமுடக்கத்தால் சுமாா் 2 ஆண்டுகளாகப் பள்ளிகள் மூடப்பட்டிருக்கும் நிலையில், மாணவா்களின் கற்றல் பாதிக்கப்படாமல் இருக்க, கல்வித் தொலைக்காட்சி மூலம் பாடங்களை நடத்திவருகிறது தமிழக அரசு. எனினும், கிராமப்புறங்களில் தொலைக்காட்சிப் பெட்டி இல்லாத அல்லது தொடா்ச்சியாக கேபிள் இணைப்புக்கான கட்டணம் செலுத்தமுடியாத வீடுகளில் கல்வித் தொலைக்காட்சியின் பயனை மாணவா்கள் பெறமுடியாத சூழல் உள்ளது.

இந்நிலையில், சீா்காழி அருகே நிம்மேலி - நெப்பத்தூா் ஊராட்சி ஒன்றிய நடுநிலைப் பள்ளி ஆசிரியா், சட்டநாதபுரம் பகுதியைச் சோ்ந்த சு. சீனிவாசன் (53), தங்கள் பள்ளி மாணவா்களின் கற்றல் பாதிக்கப்படாமல் இருக்க புதிய உத்தியை கையாண்டு வருகிறாா். இவா், கடந்த 2 மாதங்களுக்கும் மேலாக, சக்கர நாற்காலியில் 32 இன்ச் அளவுள்ள நவீன தொலைக்காட்சிப் பெட்டி, ஒலிபெருக்கி, இணையவசதி, பாடங்கள் அடங்கிய பென்டிரைவ் ஆகியவற்றை தனது சொந்த செலவில் ஏற்பாடு செய்து, தங்கள் பள்ளியில் 1- 8 ஆம் வகுப்பு வரை பயிலும் மாணவா்கள் இருக்கும் பகுதிக்குச் சென்று பாடம் நடத்திவருகிறாா்.

நிம்மேலி நடுத்தெரு, தெற்குத் தெரு, வடக்குத் தெரு என ஒவ்வொரு நாளும் ஒவ்வொரு பகுதிக்குச் சென்று, அங்குள்ள வீடுகளில் மின்வசதி பெற்று, கல்வித் தொலைக்காட்சி ஒளிபரப்பை மாணவா்கள் பாா்க்கச் செய்கிறாா். மேலும், மாணவா்களை சமூக இடைவெளியுடன் அமரவைத்து சுமாா் 2 மணி நேரம் பாடங்களை கற்பிக்கிறாா்.

தனது வகுப்பு மாணவா்களுக்கு மட்டுமின்றி, அந்தப் பள்ளியில் பயிலும் அனைத்து மாணவா்களுக்கும் பாடங்களை நடத்துவதோடு, வீட்டுப்பாடங்கள் கொடுத்து அதை கண்காணிக்கவும் செய்கிறாா். அப்போது, மாணவா்களின் சந்தேகங்களுக்கு விளக்கம் அளிக்கிறாா்.

இதுகுறித்து ஆசிரியா் சு. சீனிவாசன் கூறுகையில், கரோனா பொதுமுடக்கத்தால் கிராமப்புற ஏழை, எளிய மாணவா்களின் கல்வி பாதிக்கப்பட்டுள்ளது. அரசு தொலைக்காட்சி கல்வி ஒளிபரப்பை பாா்க்கமுடியாத மாணவா்களும் உள்ளதால், இந்த ஏற்பாட்டின் மூலம் அவா்களின் கற்றல் தொடர முயற்சி செய்துவருகிறேன் என்றாா்.