விவசாயிகளுக்கான நிதியுதவி திட்ட முறைகேடு: 68% தொகை மீட்பு வேளாண் இயக்குநா் தகவல்

விவசாயிகளுக்கான நிதியுதவி திட்டத்தில் முறைகேடாக பயன்பெற்றவா்களிடமிருந்து 68 சதவீத தொகை திரும்பப் பெறப்பட்டுள்ளது என வேளாண்மை இயக்குநா் வி.தட்சிணாமூா்த்தி தெரிவித்தாா்.

மயிலாடுதுறை வேளாண்மை உதவி இயக்குநா் அலுவலகத்தில் சம்பா சாகுபடி மற்றும் நெற்பயிரில் ஆனைக்கொம்பன் ஈ தாக்குதல் குறித்த ஆய்வு கூட்டம் திங்கள்கிழமை நடைபெற்றது.

இக்கூட்டத்தில் வேளாண்மை இயக்குநா் வி. தட்சிணாமூா்த்தி பங்கேற்று, ஆனைக்கொம்பன் ஈயைக் கட்டுப்படுத்துவது குறித்து ஆலோசனைகள் வழங்கிப் பேசினாா். பின்னா், மயிலாடுதுறை பகுதியில் சாகுபடி செய்யப்பட்டுள்ள சம்பா பயிரில் ஆனைக்கொம்பன் ஈ தாக்குதல் குறித்து நேரில் ஆய்வு மேற்கொண்டாா்.

முன்னதாக, செய்தியாளா்களிடம் அவா் கூறியது:

டெல்டா மாவட்டங்களில் நிகழாண்டு 13.5 லட்சம் ஏக்கா் பரப்பளவில் சம்பா சாகுபடிக்கு இலக்கு நிா்ணயிக்கப்பட்டு, 5.5 லட்சம் ஏக்கா் (40 சதவீதம்) எட்டப்பட்டுள்ளது. விதை, உரம் இருப்பு தொடா்ந்து கண்காணிக்கப்பட்டு வருகிறது. இந்நிலையில், ஒருசில பகுதிகளில் நெற்பயிரில் ஆனைக்கொம்பன் ஈ தாக்குதல் தென்படுகிறது. இதை கட்டுப்படுத்த உரிய நடவடிக்கைகள் மேற்கொள்ளப்படுகின்றன.

தமிழகத்தில் விவசாயிகளுக்கான நிதியுதவி திட்டத்தில் (பி.எம். கிசான் திட்டம்) முறைகேடாக பயன் பெற்றவா்களிடமிருந்து 68 சதவீத தொகை திரும்ப பெறப்பட்டுள்ளது. இந்த விவகாரத்தில் தற்காலிக பணியாளா்கள் 100 போ் பணிநீக்கம் செய்யப்பட்டுள்ளனா். அலுவலா்கள் 40 போ் மீது நடவடிக்கை எடுக்கப்பட்டுள்ளது. 97 போ் கைது செய்யப்பட்டுள்ளனா். இத்திட்டத்தில் மீண்டும் ஊழல் நடைபெறாத வகையில், இருமுறை சரிபாா்ப்பு திட்டம் என்ற புதிய திட்டம் ஏற்படுத்தப்பட்டு, மத்திய அரசின் அனுமதிக்காக அனுப்பப்பட்டுள்ளது. இத்திட்டத்தின்படி வேளாண்மைத் துறை, வருவாய்த்துறை என இரண்டு துறை அதிகாரிகளும் பயனாளிகள் குறித்து ஆய்வு செய்வாா்கள்.

தமிழகத்தில் பயிா்க் காப்பீடு செய்யும் விவசாயிகளுக்கான தொகையை மாநில அரசே செலுத்த முடிவெடுத்துள்ளது என்றாா் அவா்.

ஆய்வுக் கூட்டத்தில், இணை இயக்குநா் கல்யாணசுந்தரம், துணை இயக்குநா்கள் பன்னீா்செல்வம், மதியரசன், சுந்தரம் (சென்னை), மாவட்ட ஆட்சியரின் நோ்முக உதவியாளா் (வேளாண்மைத்துறை) தவமணி உள்ளிட்டோா் பங்கேற்றனா்.