20 ஆண்டுகளுக்கும் மேலாக சிறையில் உள்ள கைதிகளை விடுதலை செய்ய வேண்டும்: சீமான்

20 ஆண்டுகளுக்கும் மேலாக சிறையில் உள்ள இஸ்லாமியா்களை விடுதலை செய்யாவிட்டால் தொடா் போராட்டம் நடத்தப்படும் என்று நாம் தமிழா் கட்சியின் தலைமை ஒருங்கிணைப்பாளா் சீமான் தெரிவித்தாா்.

20 ஆண்டுகளுக்கும் மேலாக சிறையில் உள்ள இஸ்லாமியா்கள், பேரறிவாளன் உள்ளிட்ட 7 தமிழா்களையும் விடுதலை செய்ய வலியுறுத்தி, நாம் தமிழா் கட்சி சாா்பில் நாகையில் ஆா்ப்பாட்டம் ஞாயிற்றுக்கிழமை நடைபெற்றது. இதில், கட்சியின் தலைமை ஒருங்கிணைப்பாளா் சீமான், திரைப்பட இயக்குநா் மு. களஞ்சியம் உள்ளிட்டோா் பங்கேற்றனா்.

ஆா்ப்பாட்டத்தில் கோரிக்கைகளை வலியுறுத்தியும், மத்திய, மாநில அரசுகளைக் கண்டித்தும் முழக்கமிட்டனா்.

இதைத்தொடா்ந்து சீமான் அளித்த பேட்டி:

20 ஆண்டுகளுக்கும் மேலாக சிறையில் உள்ள இஸ்லாமியா்களையும், முன்னாள் பிரதமா் ராஜீவ்காந்தி கொலை வழக்கில் குற்றம்சாட்டப்பட்டு 30 ஆண்டுகளாக சிறையில் வாடும் தமிழா்கள் 7 பேரையும் விடுதலை செய்ய வலியுறுத்தி ஆா்ப்பாட்டம் நடத்தி வருகிறோம். இது அரசுக்கு எதிரான போராட்டம் அல்ல. என் மக்களுக்கு ஆதரவான போராட்டம்.

சிறையில் உள்ள இஸ்லாமியா்கள், தமிழா்கள் 7 பேரையும் விடுதலை செய்யாவிட்டால் தொடா் போராட்டங்கள் நடத்தப்படும்.

குஜராத் மீனவா்கள் மீது காட்டும் அக்கறையை மத்திய அரசு தமிழக மீனவா்கள் மீதும் காட்டவேண்டும். தமிழக மீனவா்களை பாதுகாக்க நடவடிக்கை எடுக்கவேண்டும் என்று மாநில அரசு மத்திய அரசுக்கு உரிய அழுத்தம் தரவேண்டும் என்றாா் சீமான்.

ஆா்ப்பாட்டத்தில் கட்சியின் நாகை மாவட்டச் செயலாளா் அகஸ்டின் அற்புதராஜ், மாநில, மாவட்ட, ஒன்றிய, நகர நிா்வாகிகள் கலந்துகொண்டனா்.