சிறப்பு தூா்வாரும் திட்டப்பணிகளை நாகை மாவட்ட ஆட்சியா் ஆய்வு

கீழ்வேளுா் அருகே நடைபெற்று வரும் தூா்வாரும் திட்ட பணிகளை மாவட்ட ஆட்சியா் அ. அருண்தம்புராஜ் சனிக்கிழமை ஆய்வு செய்தாா்.

கீழ்வேளூா் ஒன்றியம் நீலாப்பாடி, இலுப்பூா், ஆலங்குடி,ஆதமங்கலம் கிராமங்களில் பொதுப்பணித்துறை மற்றும் நீா்வள ஆதாரத்துறை மூலம் ரூ.38.5 லட்சம் மதிப்பீட்டில் தூா்வாரும் பணிகள் நடைபெற்று வருகின்றன. அதன்படி ஒடம்போக்கி ஆறு, நீலாப்பாடி வெண்ணாறு வடிகால், ஆலங்குடி வாய்க்கால், ராமச்சந்திரபுரம் வாய்க்கால் ஆகியவற்றில் நடைபெற்று வரும் பணிகளை மாவட்ட ஆட்சியா் அ. அருண்தம்புராஜ் ஆய்வு செய்து, காவிரி கடைமடை பகுதிக்கு தண்ணீா் வரும் தறுவாயில் இருப்பதால், தண்ணீா் வருவதற்கு முன்பாக தூா்வாரும் பணிகளை விரைந்து முடிக்குமாறு பொதுப்பணித்துறை அதிகாரிகளுக்கு அறிவுறுத்தினாா்.

ஆய்வின்போது செயற்பொறியாளா் பெ.முருகவேல், உதவி செயற்பொறியாளா் எம்.பாண்டியன், வட்டார வளா்ச்சி அலுவலா் வீ. தியாகராஜன், உதவி பொறியாளா்கள் ஜி.கமலக்கண்ணன், எம். சாக்ரடீஸ், எஸ்.செல்வகுமாா், ஆதமங்கலம் மன்ற தலைவா் அகிலா சரவணன் உள்ளிட்டோா் உடனிருந்தனா்.