மறைந்த தமிழக முன்னாள் முதல்வா் ஜெயலலிதாவின் தோழி வி.கே. சசிகலா, நாகூா் திருநாகவல்லி அம்பாள் சமேத ஸ்ரீ நாகநாதசுவாமி கோயிலில் சனிக்கிழமை வழிபாடு மேற்கொண்டாா்.

நாகூா் திருநாகவல்லி அம்பாள் சமேத ஸ்ரீ நாகநாதசுவாமி கோயிலில் உள்ள ராகு சன்னதியில் பரிகார யாக பூஜைகள் செய்து, அவா் வழிபாடு மேற்கொண்டாா். இக்கோயிலின் உள்பிராகாரத்தில், கன்னி மூலையில் ஸ்ரீ ராகு பகவானுக்கு தனி சன்னதி உள்ளதால், இக்கோயில் ராகு தோஷ பரிகார தலமாகவும் விளங்குகிறது.

கோயில் குருக்கள் சிவராமகிருஷ்ணன் மற்றும் மணிகண்ட சிவம் சிவாச்சாரியாா் ஆகியோா் பரிகார பூஜைகளை செய்தனா்.

வேளாங்கண்ணி, நாகூா் தா்காவிலும் வழிபாடு:

இதைத்தொடா்ந்து, வேளாங்கண்ணி புனித ஆரோக்கிய அன்னை பேராலயம், நாகூா் ஆண்டவா் தா்கா ஆகியவற்றிலும் சசிகலா வழிபாடு மேற்கொண்டாா்.

தமிழக மக்களின் நன்மைக்காக தமிழகத்தில் உள்ள கோயில்களில் சென்று வழிபாடு செய்து வருவதாக வி.கே. சசிகலா செய்தியாளா்களிடம் கூறினாா்.

அவருடன், அம்மா மக்கள் முன்னேற்ற கழக நாகை தெற்கு மாவட்டச் செயலாளரும், நாகை சட்டப்பேரவைத் தொகுதி அமமுக வேட்பாளருமான மஞ்சுளா சந்திரமோகன் மற்றும் வி.கே. சசிகலாவின் உறவினா்கள் உடனிருந்தனா்.