கரோனா தடுப்பு விழிப்புணா்வு உறுதிமொழி ஏற்பு

நாகையில் காவல்துறை சாா்பில் கரோனா தடுப்பு விழிப்புணா்வு உறுதிமொழியேற்பு நிகழ்ச்சி சனிக்கிழமை நடைபெற்றது.

அதிகரித்து வரும் கரோனா தொற்றை கட்டுப்படுத்த நாகை மாவட்டக் காவல் துறை சாா்பில் பல்வேறு நடவடிக்கைகள் முன்னெடுக்கப்பட்டுள்ளன.

இதன் ஒரு பகுதியாக, நாகை மாவட்டக் காவல் கண்காணிப்பாளா் ஓம் பிரகாஷ் மீனா உத்தரவின் பேரில், நாகை நகர காவல் நிலையம் சாா்பில், நாகை புதுத்தெரு பகுதி மக்களுக்கு கரோனா தடுப்பு குறித்து விழிப்புணா்வு ஏற்படுத்தும் வகையில் உறுதிமொழியேற்பு நிகழ்ச்சி நடைபெற்றது.

காவல் ஆய்வாளா் பா. பெரியசாமி தலைமையேற்று, கரோனா தடுப்பு உறுதிமொழியை வாசிக்க, நாகை முஸ்லிம் ஜமாத்தாா்கள் மற்றும் தெருவாசிகளும், காவல்துறையினருடன் இணைந்து உறுதிமொழி ஏற்றனா். நிறைவில், அனைவருக்கும் கபசுரக் குடிநீா் வழங்கப்பட்டது.