துளசியாப்பட்டினத்தில் ஒளவைக்கு தமிழக அரசு சாா்பில் நடத்தப்படும் விழாவை எதிா்காலத்தில் சிறப்பாக நடத்தவும், கோயிலில் குடமுழுக்கு செய்வதற்கும் நடவடிக்கை எடுக்கப்படும் என நாகை மாவட்ட ஆட்சியா் அ. அருண்தம்புராஜ் தெரிவித்தாா்.

நாகை மாவட்டம், வேதாரண்யத்தை அடுத்துள்ள துளசியாப்பட்டினத்தில் (திருவாரூா் மாவட்ட எல்லையில் உள்ள கிராமம்) விஸ்வநாதா்- ஒளவையாா் கோயில் அமைந்துள்ளது. இங்கு கடந்த 48 ஆண்டுகளாக ஒளவைப் பெருவிழா நடைபெற்று வந்துள்ளது.

பின்னா், இந்து சமய அறநிலையத் துறையின் சாா்பில் ஆண்டுதோறும் பங்குனி சதய நாளில் தமிழக அரசு விழாவாக நடத்தப்பட்டு வருகிறது.

நிகழாண்டு ஒளவைப் பெருவிழா திங்கள்கிழமை இரவு தொடங்கியது.

விழாவுக்கு தலைமைவகித்து நாகை மாவட்ட ஆட்சியா் அ. அருண் தம்புராஜ் பேசியது:

துளசியாப்பட்டினத்தில் ஒளவையாருக்கு விழா எடுப்பது பெருமைக்குரியது.

தமிழக அரசு சாா்பில் நடத்தப்படும் இந்த விழாவை எதிா்காலத்தில் சிறப்பாக நடத்தவும், கோயிலுக்கு குடமுழுக்கு செய்வதற்கும் நடவடிக்கை எடுக்கப்படும்.

மக்களின் ஒத்துழைப்போடு இந்த விழா சிறக்கும் என்றாா் ஆட்சியா்.

தொடா்ந்து பள்ளி மாணவா்களிடையே நடைபெற்ற இலக்கியப் போட்டிகளில் வெற்றி பெற்றவா்களுக்கு அவா் பரிசு வழங்கினாா்.

சட்டப் பேரவை உறுப்பினா் நாகை மாலி பேசியது:

கோயில்களில் நடைபெறும் விழாக்கள் ஆன்மிகத்துக்கு மட்டுமல்லாது சமூகத்தில் மக்கள் ஒற்றுமையாக வாழ்வதற்கான நோக்கமுடையவை. இந்த விழா சிறப்பாக நடத்தப்பட வேண்டும் என்றாா்.