பெங்களூா் - வேளாங்கண்ணி - பெங்களூா் சிறப்பு விரைவு ரயில் சேவை ஜூலை 8-ஆம் தேதி வரை நீட்டிக்கப்பட்டுள்ளது.

தென்மேற்கு ரயில்வே பெங்களூா் - வேளாங்கண்ணி - பெங்களூா் சிறப்பு கட்டண விரைவு ரயில்களை (06547- 06548) வாரம் ஒரு முறை சனிக்கிழமைகளில் கடந்த மாா்ச் 25- ஆம் தேதி முதல் ரயில்வே இயக்கி வருகிறது.

பயணிகளின் வரவேற்பைக் கருத்தில் கொண்டு அவ்வபோது, இந்த ரயில்களின் சேவை நீட்டிக்கப்பட்டு வருகிறது.

கடந்த முறை பெங்களூா் - வேளாங்கண்ணி ரயில் மே 27- ஆம் தேதி வரை இயக்கப்படும் எனத் தெரிவிக்கப்பட்டிருந்தது. தற்போது தென்மேற்கு ரயில்வே இந்த ரயில் சேவையை ஜூலை 8-ஆம் தேதி வரை நீட்டித்து அறிவித்துள்ளது.

பெங்களூா் - வேளாங்கண்ணி - பெங்களூா் ரயிலில்

சாதாரண மக்கள் பயணிக்கும் வகையில் முன்பதிவில்லா பெட்டிகள் இல்லை. எனவே, அனைத்து தரப்பு மக்களும் இந்த ரயிலை பயன்படுத்தும் வகையில் முன்பதிவில்லா பெட்டிகளை இணைக்க வேண்டுமென கோரிக்கை எழுந்துள்ளது.

எா்ணாகுளம் - வேளாங்கண்ணி ரயில் நீட்டிப்பு

தெற்கு ரயில்வே எா்ணாகுளம் -வேளாங்கண்ணி - எா்ணாகுளம் சிறப்பு விரைவு ரயிலை இயக்கி வருகிறது.

மே 28-ஆம் தேதி வரை இயக்கப்படும் என அறிவிக்கப்பட்டிருந்த இந்த ரயில் சேவையை , தற்போது ஜூன் 25-ஆம் தேதி வரை நீட்டித்து தெற்கு ரயில்வே அறிவிப்பு வெளியிட்டுள்ளது.