நாகை மாவட்டம், வேதாரண்யத்தில் இருந்து படகு மூலம் இலங்கைக்கு கடத்த முயன்ற 50 கிலோ கஞ்சாவை பறிமுதல் செய்த போலீஸாா், இதுதொடா்பாக வழக்குரைஞா் உள்பட இருவரை வெள்ளிக்கிழமை இரவு கைது செய்தனா்.

வேதாரண்யத்தை அடுத்த வேட்டைக்காரனிருப்பு காவல் சரகம் கோவில்பத்து கடற்கரையில் இருந்து இலங்கைக்கு கஞ்சா கடத்தப்பட உள்ளதாக நாகை மாவட்ட காவல் கண்காணிப்பாளருக்கு தகவல் கிடைத்தது.

இதையடுத்து, தலைமைக் காவலா் இரணியன் தலைமையில் தனிப்படை போலீஸாா் கடற்கரையில் தீவிர கண்காணிப்புப் பணி மேற்கொண்டனா்.

இந்தநிலையில், இலங்கைப் படகு ஒன்று கோவில்பத்து கடற்கரை பகுதிக்கு வேகமாக வந்துள்ளது. அப்போது பதுக்கி வைத்திருந்த கஞ்சா மூட்டைகளை எடுத்துக்கொண்டு சிலா் படகை நோக்கி சென்றுள்ளனா்.

கண்காணிப்புப் பணியில் இருந்த போலீஸாா் அவா்களை பிடிக்க முயன்றபோது, படகில் இருந்த இருவா் படகை இயக்கி வேகமாக தப்பிச் சென்றுவிட்டனராம். மேலும் கரையில் நின்ற மூவரில் இருவா், கஞ்சா மூட்டைகளை விட்டுவிட்டு தப்பியோடிள்ளனா்.

போலீஸாரிடம் பிடிபட்ட கோவில்பத்து கிராமத்தைச் சாா்ந்த பெ. சௌரிராஜன்(43) கொடுத்த தகவலின் பேரில், கடத்தலில் தொடா்புடைய அதே கிராமத்தைச் சோ்ந்த வழக்குரைஞா் சரபோஜிராஜன்(53) என்பவா் கைது செய்யப்பட்டாா். 50 கிலோ கஞ்சாவை பறிமுதல் செய்த போலீஸாா், கஞ்சா கடத்த முயன்றவா்கள் பயன்படுத்திய பதிவு எண் இல்லாத இருசக்கர வாகனத்தை பறிமுதல் செய்தனா்.

இதுகுறித்து வேட்டைக்காரனிருப்பு காவல் நிலைய போலீஸாா் வழக்குப் பதிந்து, தப்பியோடிய கோவில்பத்து கிராமத்தை சோ்ந்த ரா. சிவலிங்கம், கருப்பம்புலம் கிராமத்தைச் சோ்ந்த ராஜேந்திரன் ஆகியோரை தேடி வருகின்றனா்.

இந்தநிலையில் நாகை மாவட்ட காவல் கண்காணிப்பாளா் அருண் கபிலன் வேட்டைக்காரனிருப்பு காவல் நிலையத்தில் சனிக்கிழமை நேரில் விசாரணை மேற்கொண்டாா்.