நாகை மாவட்டத்தில் விவசாய சங்கத் தலைவா்கள் வீட்டுக் காவலில் வைக்கப்பட்டதற்கு, தமிழக விவசாயிகள் பாதுகாப்புச் சங்கம் கண்டனம் தெரிவித்துள்ளது.

இதுகுறித்து தமிழக விவசாயிகள் பாதுகாப்புச் சங்க மாநில கொள்கைப் பரப்புச் செயலா் எஸ்.ஆா். தமிழ்செல்வன் வெளியிட்டுள்ள அறிக்கை:

தமிழக விவசாயிகள் பாதுகாப்புச் சங்கத்தின் நிறுவனா் ஈசன் முருகசாமி, கறிக்கோழி கூலி உயா்வு கோரி விவசாயிகளை திரட்டி போராட்டத்தில் ஈடுபட்டதால், அவா் மீது பொய் வழக்குப்பதிவு செய்து கைது செய்யப்பட்டு சிறையில் அடைக்கப்பட்டுள்ளாா்.

இந்நிலையில், கைது நடவடிக்கைக்கு கண்டனம் தெரிவித்தும், கைது செய்யப்பட்டவா்களை விடுவிக்க வலியுறுத்தியும், தமிழகம் முழுவதும் தமிழக விவசாயிகள் பாதுகாப்புச் சங்கத்தின் சாா்பில் ஆா்ப்பாட்டங்கள் நடந்து வருகின்றன.

இந்நிலையில், நாகை மாவட்டத்தில், மாவட்டத் தலைவா் சக்திவேல், மாநில நிா்வாகி தமிழ்செல்வன் உள்பட 10-க்கும் மேற்பட்ட விவசாயிகள் பாதுகாப்புச் சங்க நிா்வாகிகளை போலீஸாா் செவ்வாய்க்கிழமை வீட்டுக் காவலில் வைத்தனா். விவசாயிகள் சங்க நிா்வாகிகள் மீது, கிராம நிா்வாக அலுவலா் மற்றும் வருவாய் ஆய்வாளா் மூலமாக புகாா் பெறப்பட்டு, கைது செய்தவற்கான ஏற்பாடுகளும் நடைபெற்று வருவதாகக் கூறப்படுகிறது.

ஈசன் முருகசாமி உள்பட அனைவரையும் விடுதலை செய்வதோடு, நாகை மாவட்டம் நாகூா் காவல் நிலையத்தில் விவசாய பாதுகாப்புச் சங்க நிா்வாகிகள் மீது கொடுக்கப்பட்ட பொய் புகாரையும் ரத்து செய்ய வேண்டும் என்று குறிப்பிட்டுள்ளாா்.