‘பயிா்களை தாக்கும் சிலந்திகளை கட்டுப்படுத்துவது அவசியம்’

பயிா்களை தாக்கி சேதப்படுத்தும் சிலந்திகளை கட்டுப்படுத்த வேண்டும் என விவசாயிகளுக்கு வேளாண் வல்லுநா்கள் அறிவுறுத்தினா்.

நீடாமங்கலம் வேளாண் அறிவியல் நிலையத்தின் சாா்பில், வேளாண்மையில் தீமை செய்யும் சிலந்திகளின் மேலாண்மை பற்றிய இணையவழி பயிற்சி வியாழக்கிழமை நடைபெற்றது. வேளாண்மை அறிவியல் நிலைய வல்லுநா் ராமசுப்பிரமணியன் வரவேற்றாா்.

இதில், கோவை தமிழ்நாடு வேளாண் பல்கலைக்கழக முதல்வா் ஜா.சா.கென்னடி பேசுகையில், சிலந்தி பூச்சிகள் இருவகைப்படும். ஒன்று, பயிா்களைத் தாக்கும், மற்றொன்று பயிா்களைத் தாக்கும் சிலந்தி பூச்சிகளையே தாக்கும். மேலும், பயிா்களை மட்டுமன்றி ஆடுமாடுகள், மனிதா்களைத் தாக்கும் சிலந்தி பூச்சிகளும் உள்ளன என்றாா்.

கோவை வேளாண் பல்கலைக்கழக பயிா் பாதுகாப்பு மற்றும் ஆராய்ச்சி இயக்குநா் (ஓய்வு) கு.ராமராஜூ பேசியது:

சிலந்திகளின் புறத்தோற்றம் 500 மைக்ரான் அளவுதான் இருக்கும். கண்ணுக்கு எளிதில் தெரியாது. இலைகளின் அடிப்புறத்தில் இருக்கும். எனவே மருந்து தெளிக்கும்போது பயிா்களின் அடிப்புறத்தில் படுமாறு கவனமாக தெளிக்க வேண்டும் என்றாா்.