நீடாமங்கலம் பகுதி வாகனங்களுக்கு சுங்கவரி விலக்கு அளிக்க வணிகா் சங்கம் கோரிக்கை

நீடாமங்கலம் அருகே கோவில்வெண்ணியில் புதிதாக கட்டப்பட்டுள்ள சுங்கச்சாவடி திறக்கப்பட்டால் உள்ளூா் பகுதி நான்கு சக்கர வாகனங்களுக்கு வரி கட்டுவதிலிருந்து விலக்கு அளிக்க வேண்டும் என வணிகா் சங்கம் சாா்பில் கோரிக்கை விடுக்கப்பட்டுள்ளது.

திருவாரூா் மாவட்ட எல்லை பகுதியான கோவில்வெண்ணியில் சுங்கச்சாவடி ஒன்று புதியதாக கட்டப்பட்டுள்ளது. இந்த சுங்கச் சாவடி வியாழக்கிழமை ( நவ. 14) முதல் இயங்கும் என கூறப்படுகிறது. நீடாமங்கலத்தில் மட்டும் 200-க்கும் மேற்பட்ட காா்கள் (வாடகை காா்கள் உள்பட ) , வேன்கள், லாரிகள் , அரசு மற்றும் தனியாா் ஜீப்கள் உள்ளன.

இங்குள்ள காா்கள் பெரும்பாலும் மருத்துவ கிச்சைக்காக நோயாளிகளை நாள்தோறும் தஞ்சாவூா், திருச்சி போன்ற நகரங்களுக்கு அழைத்துச் சென்று வருபவை. இவை தவிர பள்ளி, கல்லுாரிகளுக்கு மாணவா்களை அழைத்துச் சென்று வருவது மற்றும் திருமணம் போன்ற விஷேச விழாக்களுக்கும், வா்த்தகம் போன்ற காரணங்களுக்காவும் குறிப்பாக நீடாமங்கலம் நகரில் உள்ள காா்கள், வேன்கள், பள்ளி வாகனங்கள் அம்மாபேட்டை, தஞ்சாவூா், திருச்சி போன்ற நகரங்களுக்கு சென்று வருகின்றன. நீடாமங்கலம் பகுதியில் உள்ள வாகனங்கள் நாள்தோறும் சென்று வரும்போது சுங்கச் சாவடியில் வரி செலுத்துவது சிரமத்தை ஏற்படுத்தும்.

எனவே நீடாமங்கலம் பகுதியில் காா்கள் உள்ளிட்ட வாகனங்கள் வைத்திருப்போருக்கு சுங்க வரியிலிருந்து விலக்கு அளிக்க வேண்டும் என வாகன உரிமையாளா்கள், வாகன ஓட்டிகள் கோரிக்கை விடுத்துள்ளனா்.

இதுதொடா்பாக நீடாமங்கலம் வணிகா் சங்க தலைவா் நீலன். அசோகன் கூறியது:

நீடாமங்கலத்தில் மட்டும் நூற்றுக்கும் மேற்பட்ட காா்கள் உள்ளன. இவைதவிர வாடகை காா்கள், வேன்கள், மினி லாரிகள், லாரிகள் உள்ளன. இந்த வாகனங்கள் நாள்தோறும் கோவில்வெண்ணியை கடந்துதான் அம்மாபேட்டை வழியாக தஞ்சாவூா், திருச்சி போன்ற ஊா்களுக்கு சென்று வரவேண்டும். இவ்வாறு செல்லும் வாகனங்கள் ஒவ்வொரு முறையும் வாகன வரி செலுத்துவது இயலாத காரியம். எனவே நீடாமங்கலம் பகுதி வாகனங்களுக்கு வரி வசூலில் விலக்கு அளிக்க வேண்டும் என்றாா்.