வாடகைக் கார்களில் சவாரிப் பகிர்வில் (RIDE SHARING) பங்கேற்கும் பெண் பயணிகளின் பாதுகாப்பு உறுதிப்படுத்தப்பட வேண்டும் என தில்லி முதல்வர் அரவிந்த் கேஜரிவால் வியாழக்கிழமை தெரிவித்தார்.  "நகர டாக்ஸி-2017' திட்டம் தில்லி அரசால் மிக  விரைவில் அறிமுகப்படுத்தப்படவுள்ளது.  இத்திட்டம் வாடகைக் கார்களில் சவாரிப் பகிர்வு அனுமதிக்கப்படமாட்டாது எனத் தகவல்கள் வெளியாகியுள்ள நிலையில் முதல்வர் இக்கருத்தை வெளியிட்டுள்ளார். 
இது தொடர்பாக  தனது சுட்டுரையில் (ட்விட்டர்) கேஜரிவால் கூறியிருப்பதாவது:  "சவாரிப் பகிர்வு நல்லதொரு திட்டமாகும்.  இது தொடர்பாக ஆலோசனை நடத்தி வருகிறோம். அறிமுகமில்லாத பயணிகளுடன் பயணிப்பது பெண் பயணிகளுக்கு பாதுகாப்பானதா என்பது தொடர்பாக ஆராய்ந்து வருகிறோம்' என்று தெரிவிக்கப்பட்டுள்ளது.