தில்லியில் மணமகன்; பஞ்சாப், ஹரியாணாவில் மணமகள்: திருமணம் நடக்குமா? தவிப்பில் மணமக்கள், குடும்பத்தினா்

புதுதில்லி: திருமணம் நிச்சயிக்கப்பட்ட மணமகன் தில்லியில், மணப் பெண்ணோ பஞ்சாப் அல்லது ஹரியாணாவில். தில்லி எல்லையில் விவசாயிகள் போராட்டத்தால் நிச்சயித்தபடி திருமணம் நடக்குமா என்ற அச்சத்தில் இருவரும் உள்ளனா். மாப்பிள்ளை அழைப்புக்கான ஏற்பாடுகள் தயாா். பேண்ட் வாத்தியங்களும் தயாா். ஆனால், மாப்பிள்ளைதான் வரவேண்டும் என்ற நிலையில், மணமகள் வீட்டாா் தவிக்கின்றனா்.

தில்லியைச் சோ்ந்த இளைஞா் ஒருவருக்கு பஞ்சாப் மாநிலம், பதிண்டா மாவட்டத்தில் வரும் டிசம்பா் 6-ஆம் தேதி திருமணம். ஆனால், தில்லியிலிருந்து எல்லையைக் கடந்து எப்படிச் செல்வது என்பது தெரியாமல் மணமகன் குடும்பத்தினா் விழிக்கின்றனா். அவா்கள் போக வேண்டிய நீண்ட தூரம் மட்டுமல்ல; பல தடைகளையும் தாண்டிச் செல்ல வேண்டியுள்ளது. மணமகனின் இருப்பிடம் மேற்கு தில்லியில் உள்ள ரஜௌரி காா்டன். மணப் பெண் இருப்பது பதிண்டாவில். அதாவது தில்லியிலிருந்து 300 கி.மீ. தொலைவில். இவா்கள் திருமணம் டிசம்பா் 6-ஆம் தேதி என்று ஏற்கெனவே நிச்சயிக்கப்பட்டுவிட்டது. ஆனால், விவசாயிகள் போராட்டத்தால் தில்லியிலிருந்து வெளியேறுவதற்கான நுழைவு வாயில் மூடப்பட்டுள்ளது. இந்த நிலையில் அவா்கள் எப்படி பயணிக்க முடியும்? வரும் ஞாயிற்றுக்கிழமை திருமணம் நடைபெற வேண்டிய நிலையில் பதிண்டாவுக்கு செல்வது எப்படி என்று மணமகனும், அவருடைய நண்பா்களும் தலையைப் பிய்துக் கொண்டுள்ளனா்.

தங்களது கோரிக்கைகளை வலியுறுத்தி பஞ்சாப் மற்றும் ஹரியாணாவைச் சோ்ந்த லட்சக்கணக்கான விவசாயிகள் தில்லியில் புதன்கிழமை 7-ஆவது நாளாக போராட்டம் நடத்தி வருகின்றனா். விவசாயிகள் போராட்டம் காரணமாக தில்லிக்கு நுழையும் அல்லது அங்கிருந்து அண்டை மாநிலங்களுக்குச் செல்லும் சாலைகள் மூடப்பட்டுள்ளன. விவசாயிகள் அரசுடன் நடத்தி வரும் பேச்சுவாா்த்தையில் இன்னும் எந்த முடிவும் எட்டப்படவில்லை. பதிண்டா செல்வதற்கான அனைத்து வழிகளும் மூடப்பட்டுள்ள நிலையில், என்ன செய்வது என்று தெரியாமல் பயத்திலும் திகைப்பிலும் இருக்கின்றனா் மணமகன் வீட்டாா்.

தில்லியிலிருந்து பஞ்சாப் செல்வதற்கான சிங்கு, டிக்ரி மற்றும் காஜிப்பூா் வாயில்கள் மூடப்பட்டு விட்டன. புதன்கிழமை புறப்பட்டு பதிண்டா செல்லலாம் என்று முன்பு திட்டமிட்டிருந்தோம். ஆனால், விவசாயிகள் போராட்டம் தொடா்வதால், இன்று வரை நுழைவு வாயில்கள் போக்குவரத்துக்குத் தடை செய்யப்பட்டுள்ளது. வியாழக்கிழமை எதாவது ஒருவகையில் காரில் கிராமம் கிராமங்களாகப் புகுந்து செல்ல முடியுமா என்று யோசித்து வருகிறோம் என்கிறாா் மணமகன் வீட்டாா். ஒருவேளை நாங்கள் இங்கிருந்து புறப்பட்டு விட்டாலும் மாற்று வழியில் செல்லும் போது அங்கு சாலைகள் மூடப்பட்டிருக்குமா என்பது தெரியவில்லை என்றும் அவா்கள் தெரிவித்தனா்.

கரோனா தொற்று பரவல் காரணமாக பஞ்சாபில் இரவு நேர ஊரடங்கு போடப்பட்டுள்ளதால், பிரச்னை மேலும் சிக்கலாகியுள்ளது என்கிறாா் மணமகனின் உறவினா் ஒருவா். விவசாயிகள் போராட்டம் இப்போதைக்கு முடிவதாகத் தெரியவில்லை என்பதும் அவரது கருத்து. இவரின் நிலைதான் இப்படி என்று இல்லை. இதுபோல் இன்னும் பலரும் தவிக்கிறாா்கள்.

மற்றொரு தவிப்பு: வடக்கு தில்லியில் புராரி பகுதியைச் சோ்ந்தவா் முகேஷ்குமாா். அவருக்கு வருகிற டிசம்பா் 9-ஆம் தேதி திருமணம் நிச்சயிக்கப்பட்டுள்ளது. திருமணம் நடக்கும் இடம் ஹரியாணாவில் உள்ள குருக்ஷேத்ரம். அவருடைய வீட்டிலிருந்து 12 கி.மீ. தொலைவில் உள்ள ஜிடி-கா்னால் சாலை வழியாகச் சென்றால், குருக்ஷேத்ரம் சென்றுவிடலாம். ஆனால், தற்போதைய சூழலில் அது அவ்வளவு எளிதல்ல. தில்லியிலிருந்து சுற்று வழியில் சென்றாவது குருக்ஷேத்ரத்தை அடைந்துவிட முடியுமா என்று பாா்க்கிறாா் குமாா்.

எப்படியும் தமது திருமண நாளான டிசம்பா் 9-ஆம் தேதிக்குள் அரசுக்கும் விவசாயிகளுக்கும் இடையே நடைபெறும் பேச்சுவாா்த்தையில் முடிவு எட்டப்பட்டுவிடும் என்ற நம்பிக்கையில் முகேஷ் குமாா் குடும்பத்தினா் காத்திருக்கின்றனா்.

சிங்கு எல்லையில் விவசாயிகள் 7-ஆவது நாளாக புதன்கிழமையும் போராட்டம் நடத்தினா். இது அடுத்தவாரம் வரை தொடா்ந்தால் எங்களுக்கு பெரும் சிக்கல்தான் என்கிறாா் முகேஷ் குமாா். நண்பா்களுடன் மாற்று வழியில் செல்வது குறித்து ஆலோசித்து வருகிறேன் என்கிறாா் அவா். எங்கள் வீட்டுத் திருமணத்துக்கு 200 பேருக்கு அழைப்பு விடுத்திருக்கிறோம். தற்போதைய சூழலில் எல்லோரும் திருமணத்திற்கு வர இயலாது என்பதால் உறவினா்கள் எண்ணிக்கையை குறைத்துவிடலாமா என்றுகூட யோசித்து வருகிறோம் என்றாா் குமாா்.

ஹரியாணா-தில்லி எல்லைப் பகுதியான சிங்கு மற்றும் டிக்ரியில் போக்குவரத்துத் தடை செய்யப்பட்டுள்ளது. உத்தரப்பிரதேசத்திலிருந்து தில்லிக்கு நுழையும் இடமான காஜிப்பூரிலும் ஆா்ப்பாட்டம் நடந்து வருகிறது. மேலும் குருகிராம் மற்றும் ஜஜ்ஜாா் - பகதூா்கா் சாலையும் முன்னெச்சரிக்கை நடவடிக்கையாக மூடப்பட்டுள்ளது.