புதிய கல்வி ஆண்டு தொடங்கியது; மாணவா்கள் வருகை இல்லை!

புதுதில்லி: தில்லியில் புதிய கல்வி ஆண்டு வியாழக்கிழமை தொடங்கியது. ஆனால், பள்ளிகளில் மாணவா்களின் வருகையைக் காண முடியவில்லை. இந்த நிலையில், தில்லியில் கரோனா தொற்று பாதிப்பு மீண்டும் அதிகரித்து வருவது மக்களிடையே அச்சத்தை ஏற்படுத்தியுள்ளது.

தில்லியில் கரோனா தொற்று பரவல் அதிகரித்ததை அடுத்து கடந்த ஆண்டு மாா்ச் மாதம் பொது முடக்கம் அறிவிப்பதற்கு சில நாள்கள் முன்னதாக பள்ளிகள் மூடப்பட்டன. பின்னா் ஏப்ரல் மாதம் முதல் வகுப்புகள் ஆன்லைன் மூலமே நடைபெற்று வந்தன. அது இந்த ஆண்டு ஏப்ரல் மாதத்திலும் தொடரும் எனத் தெரிகிறது.

தில்லியில் அரசுப் பள்ளிகள் மற்றும் சில தனியாா் பள்ளிகளில் புதிய கல்வியாண்டு வியாழக்கிழமை தொடங்கியது. சில பள்ளிகள் ஏப்ரல் 5- ஆம் தேதியிலிருந்து பள்ளிகளைத் திறக்க திட்டமிட்டுள்ளன. புதிய கல்வி ஆண்டிலாவது மாணவா்கள் பள்ளிக்கு வருவாா்கள். சக மாணவா்களுடன் சோ்ந்து பயில்வாா்கள் என்று நினைத்திருந்தோம். ஆனால், தற்போதைய சூழ்நிலையில் தில்லியில் மீண்டும் கரோனா பாதிப்பு அதிகரித்துள்ளதானது மீண்டும் பள்ளிகள் உடனடியாக திறப்பதற்கான வாய்ப்புகள் இல்லை என்பதையே காட்டுகின்றன என்றாா் தாகூா் இன்டா்நேஷனல் பள்ளியைச் சோ்ந்த பெயா் குறிப்பிட விரும்பாத ஆசிரியா் ஒருவா்.

கல்வித் துறை இயக்குநரகம் கடந்தம ாதம் ஓா் அறிக்கை வெளியிட்டிருந்தது. அனைத்து அரசுப் பள்ளிகளிலும் ஏப்ரல் முதல் தேதியிலிருந்து புதிய கல்வி ஆண்டு தொடங்கப்பட வேண்டும் என்றும், 9-ஆம் வகுப்புகள் வரை பாடங்கள் நடைபெறும் என்றும் தெரிவித்திருந்தது. ஆனால், தனியாா் பள்ளிகளுக்கு அது தொடா்பான எந்த அறிவிக்கையும் இதுவரை வெளியிடப்படவில்லை. 9-ஆம் வகுப்பிலிருந்து பன்னிரெண்டாம் வகுப்பு வரை உள்ள மாணவா்கள் வகுப்புகளுக்கு வரவேண்டுமா அல்லது முன்னா் வெளியிடப்பட்ட உத்தரவு அடுத்த மாதம் பொதுத் தோ்வு எழுதும் மாணவா்களுக்கு மட்டும் தானா என்பது தெளிவுபடுத்தப்படவில்லை என்று தனியாா் பள்ளிகள் தெரிவித்தன.

மேலும் 9-ஆம் வகுப்புக்கு மேலாக படிக்கும் மாணவா்கள் பள்ளிக்கு வந்து படிக்க வேண்டுமா அல்லது ஆன்லைன் மூலம் அவா்களுக்கு வகுப்பு நடக்குமா என்பது பற்றி எந்த தெளிவான வழிகாட்டுதலும் இல்லை என்றாா் மவுன்ட் அபு பொதுப் பள்ளி முதல்வா் ஜோதி அரோரா. இது தொடா்பாக பள்ளிக் கல்வி இயக்குநரகத்தை தொடா்பு கொண்டு கேட்ட போது, புதிய கல்வி ஆண்டிற்கான வகுப்புகள் அனைவருக்கும் ஆன்லைன் மூலமே நடைபெறும் என்று தெரிவித்தனா். 9-ஆம் வகுப்பு முதல் 12- ஆம் வகுப்பு வரையிலான மாணவா்களைப் பொருத்தவரையில் அவா்கள் தங்கள் செய்முறைப் பயிற்சிகளை பூா்த்தி செய்வதற்காகவே முந்தைய உத்தரவு வெளியிடப்பட்டது. அதன்பின் அவா்கள் மே மாதம் நடைபெறும் பொதுத் தோ்வுக்கு தயாராவாா்கள் என்று தெரிவித்தனா்.

ஸ்பிரிங்டேல்ஸ், தில்லி பப்ளிக் ஸ்கூல், தாகூா் இன்டா்நேஷனல், இந்தியன் ஸ்கூல், பிா்லா வித்யா நிகேதன், பாலபாரதி பப்ளிக் ஸ்கூல் உள்ளிட்ட தனியாா் பள்ளிகள் தொடா்ந்து ஆன்லைன் மூலமே வகுப்புகளை நடத்தி வருகின்றன. கடந்த ஆண்டு ஏப்ரல் முதல் செப்டம்பா் மாதம் வரை அனைத்து மாநிலங்களிலும் பள்ளிகள் மூடப்பட்டிருந்தன. சில மாநிலங்களில் பள்ளிகள் அக்டோபா் மாதம் திறக்கப்பட்டன. எனினும், அவையும் பின்னா் கரோனா தொற்று அதிகரிப்பால் பள்ளிகளை மீண்டும் மூடிவிட்டன.

தில்லியில் 9-ஆம் வகுப்பு முதல் 12- ஆம் வகுப்பு வரை படிக்கும் மாணவா்களுக்கான செய்முறைத் தோ்வுகளுக்காக கடந்த ஜனவரி 18 மற்றும் பிப்ரவரி 5 ஆம் தேதி பள்ளிகள் திறக்கப்பட்டு மாணவா்கள் அனுமதிக்கப்பட்டனா். கடந்த புதன்கிழமை தில்லியில் 1,819 பேருக்கு புதிதாக கரோனா தொற்று இருப்பது தெரிய வந்தது. அதாவது கரோனா பாதிப்ப்ு 2.71 சதவீதமாக அதிகரித்தது. 11 போ் கரோனாவுக்கு பலியானாா்கள்.

கடந்த ஜனவரி 1-ஆம் தேதி வரை 6.25 லட்சம் போ் கரோனா தொற்றால் பாதிக்கப்பட்டிருந்தனா். அன்றைய நிலவரப்படி பலி எண்ணிக்கை 10,557 ஆக இருந்தது. பின்னா் பிப்ரவரியில் தினசரி கரோனா பாதிப்பு குறையத்தொடங்கியது. கடந்த பிப்ரவரி 26- ஆம் தேதி தில்லியில் 256 கரோனா பாதிப்புகள் பதிவு செய்யப்பட்டன. எனினும், மாா்ச் மாதம் முதல் தில்லியில் கரோனா தினசரி பாதிப்பு அதிகரிக்கத் தொடங்கிவிட்டது.