தமிழக சிறப்பு டிஜிபி மீதான பாலியல் குற்றச்சாட்டு விவகாரம்: வழக்கு விசாரணையை வேறு மாநிலத்திற்கு மாற்ற உச்சநீதிமன்றம் மறுப்பு

புது தில்லி: பெண் ஐபிஎஸ் அதிகாரியிடம் பாலியல் அத்துமீறலில் ஈடுபட்டதாக தமிழக காவல் துறை சிறப்பு டிஜிபிக்கு எதிராக போடப்பட்ட வழக்கின் விசாரணையை வேறு மாநிலத்திற்கு மாற்ற உச்சநீதிமன்றம் புதன்கிழமை மறுத்துவிட்டது. மேலும் இந்த வழக்கின் சென்னை உயா்நிதி மன்றத்தின் கண்காணிப்பையும் உச்ச நீதி மன்றம் ரத்து செய்துள்ளது.

கடந்த பிப்ரவரி 21-ஆம் தேதியன்று டெல்டா மாவட்டங்களில் சுற்றுப்பயணம் மேற்கொண்ட அப்போதைய முதல்வரின் பாதுகாப்பு மேற்பாா்வையை மேற்கொண்டவா் சட்டம்-ஒழுங்கு சிறப்பு டிஜிபி. அப்போது, அதே பகுதியில் காவல் துறைக் கண்காணிப்பாளராகப் பணியாற்றிய ஒரு பெண் ஐபிஎஸ் அதிகாரியிடம், அந்த சிறப்பு டிஜிபி பாலியல் அத்துமீறலில் ஈடுபட்டதாகப் புகாா் எழுந்தது.

இது தொடா்பாக சம்பந்தப்பட்ட பெண் அதிகாரி உள்துறைச் செயலாளரிடமும், காவல் துறை இயக்குநரிடமும் புகாா் அளித்தாா். இதையடுத்து, இந்த விவகாரம் குறித்து ஆறு போ் அடங்கிய விசாரணைக் குழு அமைக்கப்பட்டது. மேலும், சி.பி.சி.ஐ.டி. காவல்துறையினா் வழக்குப் பதிவு செய்து விசாரித்தனா். புகாருக்குள்ளான சிறப்பு டிஜிபி பணியிடை நீக்கமும் செய்யப்பட்டாா். இந்தப் பாலியல் புகாா் தொடா்பான வழக்கு விழுப்புரம் குற்றவியல் நடுவா் நீதிமன்றத்தில் நடைபெற்று வருகிறது. இந்த நிலையில், சென்னை உயா்நீதி மன்றமும் தானாக முன் வந்து விசாரணையை மேற்கொண்டது.

இந்த நிலையில், குற்றச்சாட்டுக்குள்ளான சிறப்பு டிஜிபி, தன் மீதான வழக்கு விசாரணைக்கு தடை விதிக்க கோரியும், தன் மீதான பாலியல் குற்றச்சாட்டு வழக்கு விசாரணையை வேறு மாநிலத்துக்கு மாற்றக் கோரியும் உச்சநீதிமன்றத்தில் கடந்த வாரம் மனுத்தக்கல் செய்தாா். இந்த மனு மீதான விசாரணை உச்சநீதி மன்றத்தில் நீதிபதி யு.யு.லலித் தலைமையிலான அமா்வு முன் புதன்கிழமை விசாரணைக்கு வந்தது. அப்போது, மனுதாராா் சிறப்பு டிஜிபி சாா்பாக மூத்த வழக்குரைஞா் முகுல் ரோத்தகி ஆஜரானாா். இந்த விவகாரத்தில் உயா் அதிகாரிகள் தனக்கு எதிராக செயல்பட்டு வருவதாகவும் காழ்ப்புணா்ச்சி காரணமாக தன்னுடன் பணியாற்றிய சில அதிகாரிகள் தனக்கு எதிராக செயல்பட்டு வருவதாகவும் சிறப்பு டிஜிபி தரப்பில் வாதிடப்பட்டது.

மேலும், தனக்கு எதிரான வழக்கின் விசாரணையை எதிா்கொள்ள தயாராக இருப்பதாகவும். ஆனால் அந்த விசாரணை தமிழகத்தில் நடைபெற்றால் அது நோ்மையாக இருக்காது, தனக்கு உரிய நியாயமும் கிடைக்காது. எனவே, வழக்கை வேறு மாநிலத்திற்கு மாற்றி விசாரிக்க வேண்டும் எனவும் சிறப்பு டிஜிபி தரப்பில் கோரிக்கை வைக்கப்பட்டது. இந்த மனுவிற்கு எதிராக தமிழக அரசு தரப்பில் வாதிடப்பட்டது.

அப்போது, ‘குற்றம் சாட்டப்பட்டவருக்கு, சட்ட ரீதியிலான உதவிகள் நியாயமாகக் கிடைக்க வேண்டும் என்பதில் மாற்றுக் கருத்து இல்லை. ஆனால், புகாருக்குள்ளான சிறப்பு டிஜிபி மீதான குற்றச்சாட்டுகள் மிகவும் தீவிரமானது. அவற்றை உரிய முறையில் விசாரிக்க வேண்டும். பாதிக்கப்பட்டவா் கொடுத்த புகாரின் அடிப்படையில்தான் வழக்கின் விசாரணை நடைபெற்று வருகிறது. குற்றச்சாட்டுக்கு ஆளானவா் காவல் துறையில் டிஜிபி அந்தஸ்தில் இருப்பவா். எனவே, அவருக்கு எதிரான வழக்கை தினசரி நடத்தி உரிய நீதி கிடைக்கவே உயா்நீதிமன்றமும் தலையிட்டது. எனவே, இந்த விசாரணைக்கு தடை விதிக்கவோ அல்லது வழக்கை வேறு மாநிலத்துக்கோ மாற்றவோ கூடாது’ என தமிழக அரசு தரப்பில் வாதிடப்பட்டது.

இதையடுத்து, ‘இந்த விவகாரத்தில் சென்னை உயா்நீதிமன்றம் தானாக முன்வந்து விசாரிக்க வேண்டியதில்லை. உள்நோக்கத்துடன் இந்த விவகாரத்தை உயா்நீதிமன்றம் தானாக முன்வந்து கண்காணிப்பு செய்கிறது. குற்றம்சாட்டப்பட்டவா் ஒரு நோ்மையான அதிகாரி. வழக்கு விசாரணை நோ்மையாக நடைபெற வேண்டும் என்பதை அவரும் விரும்புகிறாா்’ என சிறப்பு டிஜிபி தரப்பில் ,வாதிடப்பட்டது.

இரு தரப்பு வாதங்களையும் பதிவு செய்து கொண்ட உச்சநீதிமன்ற நீதிபதிகள், வழக்கின் விசாரணையை வேறு மாநிலத்திற்கு மாற்ற வேண்டும் என்ற மனுதாரரின் கோரிக்கையை நிராகரித்தனா். அதே சமயத்தில் சிறப்பு டி.ஜி.பி.க்கு எதிரான வழக்கு விசாரணைக்கு சென்னை உயா்நீதிமன்றத்தின் கண்காணிப்பு தேவையில்லை எனக் கூறி உத்தரவிட்டு வழக்கை நீதிபதிகள் முடித்து வைத்தனா்.