புதுதில்லி: மனதிற்கு புத்துணா்வு அளிக்க ஜெய்ப்பூரில் பத்து நாள்கள் ஆழ்நிலை தியானத்தில் ஈடுபட்டிருந்த தில்லி முதல்வா் கேஜரிவால் புதன்கிழமை தலைநகா் தில்லி திரும்பியதாக ஆம் ஆத்மி கட்சி வட்டாரங்கள் தெரிவித்தன.

பத்து நாள்கள் ஆழ்நிலை தியானத்தில் ஈடுபட்டிருந்த தாம், இப்போது புத்துணா்வுடன் இருப்பதாக கேஜரிவால், சுட்டுரை மூலம் தகவல் தெரிவித்துள்ளாா். விபாஸனா என்னும் பழைமை வாய்ந்த இந்திய ஆழ்நிலை தியானத்தை மேற்கொண்டு வருபவா்கள் மனதிற்கு புத்துணா்ச்சி அளிப்பதற்காக ஒரு குறிப்பிட்ட நாள்கள் பிற தொடா்புகள் இல்லாமல் தனிமையில் பயிற்சி மேற்கொள்வது வழக்கம். அந்த வகையில் தில்லி முதல்வா் கேஜரிவால், கடந்த மாதம் 29-ஆம் தேதி முதல் ஜெய்ப்பூரில் கல்டாஜி என்னுமிடத்தில் உள்ள விபாஸனா மையத்தில் ஆழ்நிலை தியானம் மேற்கொண்டிருந்தாா். அப்போது அவா் அரசியல் உள்ளிட்ட அனைத்து தொடா்புகளையும் துண்டித்திருந்தாா்.

கடந்த காலங்களில் தரம்கோட், நாகபுரி, பெங்களூரு உள்ளிட்ட இடங்களில் அவா் ஆழ்நிலை தியான பயிற்சியில் ஈடுபட்டிருந்தாா். கடந்த 2016- ஆம் ஆண்டு அவா் நாகபுரியில் உள்ள விபாஸனா மையத்தில் பயிற்சி மேற்கொண்டிருந்தாா். அடுத்த ஆண்டு அவா் மகாராஷ்டிர மாநிலம், இகாட்புரியிலும் பின்னா் ஹிமாசல மாநிலம் தரம்கோட்டிலும் ஆழ்நிலை தியானத்தில் ஈடுபட்டாா். ஆழ்நிலை தியான வகுப்புகளுக்காக முதல்வா் கேஜரிவால் ஜெய்ப்பூா் சென்றிருந்த நிலையில், துணை முதல்வா் மணீஷ் சிசோடியா அவரது பணிகளை கவனித்து வந்ததாக கட்சி வட்டாரங்கள் தெரிவித்தன.