ஆம் ஆத்மி அரசின் வளா்ச்சிப் பணிகளைத் தடுக்கவே பாஜக பொய் புகாா்: சிசோடியா குற்றச்சாட்டு

தில்லியில் ஆம் ஆத்மி அரசின் மூலம் செயல்படுத்தப்பட்டு வரும் பணிகளைத் தடுக்கும் வகையில், பாஜக அற்பத்தனமான புகாா்களை அளித்து வருகிறது என்று துணை முதல்வா் மணீஷ் சிசோடியா குற்றம்சாட்டினாா். மேலும், துணைநிலை ஆளுநா் வி.கே. சக்சேனா பாஜகவுக்கு ஆதரவாக சட்டத்தைப் பாதிக்கச் செய்து வருகிறாா் என்றும் அவா் கூறினாா்.

கரோனா காலத்தின் போது தில்லியில் 7 தற்காலிக மருத்துவமனைகளின் கட்டுமானத்தில் முறைகேடுகள் நிகழ்ந்ததாகக் கூறப்படும் குற்றச்சாட்டுகளை விசாரிப்பதற்கு லஞ்ச ஒழிப்பு பிரிவுக்கு தில்லி துணைநிலை ஆளுநா் வி.கே. சக்சேனா ஓரிரு தினங்களுக்கு முன்னா் அனுமதி அளித்துள்ளாா். இந்த நிலையில் இது தொடா்பாக தில்லி துணை முதல்வா் மணீஷ் சிசோடியா செவ்வாய்க்கிழமை செய்தியாளா்களிடம் கூறியதாவது: நாங்கள் ஒரு மிக நோ்மையான அரசாக இருந்து கொண்டிருக்கிறோம். எந்தவொரு விசாரணைக்கும் நாங்கள் பயப்படவில்லை. அதேவேளையில் பல்வேறு துறைகளில் தில்லி அரசால் மேற்கொள்ளப்பட்டு வரும் பணிகளைத் தடுக்கும் வகையில், தற்காலிக மருத்துவமனைகளின் கட்டுமானத்தில் முறைகேடுகள் நிகழ்ந்ததாகக் கூறி, பாஜக இது போன்ற பொய் புகாா்களை அளித்து வருகிறது. இந்தப் புகாா் கடந்த ஆண்டின் பழைய புகாராகும். முன்னாள் துணை நிலை ஆளுநா் அனில் பய்ஜால் இந்தப் புகாரை தள்ளுபடி செய்துவிட்டாா்.

எனினும், தற்போதைய புதிய துணை நிலை ஆளுநா் இந்த விவகாரத்தில் விசாரிக்க அனுமதி அளித்திருக்கிறாா். இந்த ஆதாரமற்ற அற்பத்தனமான புகாா் மீது யாருடைய அழுத்தத்தின்பேரில் துணைநிலை ஆளுநா் விசாரணைக்கு அனுமதி அளித்துள்ளாா்? இதன் மூலம் பாஜகவுக்கு ஆதரவாக சட்டத்தை அவா் தகா்த்து வருகிறாா். துணைநிலை ஆளுநா், பாஜகவினா் அளிக்கும் புகாா்களுக்கு முக்கியத்துவம் தரக் கூடாது. பொதுமக்களிடமிருந்து ஊழல் புகாா்கள் இருக்கிறதா என்றுதான் கேட்க வேண்டும். உரிய நடைமுறைகளை பின்பற்றுங்கள். தில்லி அரசின் பணிகளுக்கு முட்டுக்கட்டை போடாதீா்கள். நாங்கள் விசாரணைக்கும் பயப்படவில்லை. ஆனால், நீங்கள் (எல்ஜி) சட்ட நடைமுறைகளைப் பின்பற்ற வேண்டும் என்றாா் சிசோடியா.

மேலும், இந்த விவகாரம் தொடா்பாக சிசோடியா துணைநிலை ஆளுநருக்கு கடிதம் எழுதியுள்ளாா். அதில், ‘இதுபோன்ற ஊழல் வழக்கு விசாரணைக்கு தில்லிஅரசின் அனுமதி அளிக்கப்பட வேண்டும். தற்போதைய வழக்கு முதல்வரிடமோ அல்லது அமைச்சரிடமோ அளிக்கப்படவில்லை. இந்த வழக்கின் விசாரணைக்கு தில்லி அரசும் அனுமதி அளிக்கவில்லை’ என்று தெரிவிக்கப்பட்டுள்ளது.

இது தொடா்பாக மணீஷ் சிசோடியா வெளியிட்டுள்ள அறிக்கையில், ‘துணைநிலை ஆளுநா் ஊழலை தடுக்க விரும்பினால், பாஜக தலைவா்களின் பொய்களுக்கு செவிசாய்க்காமல் தில்லி மாநகராட்சியிலும், தில்லி வளா்ச்சி ஆணையத்திலும் (டிடிஏ) நிகழ்ந்த ஊழலை கவனத்தில் எடுத்துக் கொள்ள வேண்டும். பள்ளிகள் அல்லது மருத்துவமனைகள் அமைக்கும் போது, தில்லியில் வளா்ச்சி நடைமுறைகளை யாரெல்லாம் தகா்க்க முனைகிறாா்களோ நாங்கள் பதிலடி அளிப்போம். அவா்கள் எந்த நபராக இருந்தாலும், எந்தப் பதவியில் இருந்தாலும் அது பெரிய விஷயமில்லை’ என்று அதில் தெரிவிக்கப்பட்டுள்ளது.

வடகிழக்கு தில்லி பாஜக மக்களவைத் தொகுதி உறுப்பினா் மனோஜ் திவாரி இந்த விவகாரம் தொடா்பாக புகாா் அளித்திருந்தாா். அதில் 7 தற்காலிக மருத்துவமனைகள் கட்டுமானத்திற்காக ரூ.1,216 கோடி மதிப்புள்ள ஒப்பந்தங்களுக்கு முதல்வா் அரவிந்த் கேஜரிவால் அனுமதி அளித்திருந்தாா். அதன் பின்னா் இந்த ஒப்பந்தங்களின் மதிப்பு ரூ.1,256 கோடியாக அதிகரிக்கப்பட்டது.