ரூ.20 கோடி மோசடி வழக்கு நிலவர அறிக்கை தாக்கல் செய்ய தில்லி காவல் துறைக்கு உத்தரவு

புது தில்லி: முன்னாள் ஊழியா்கள் சுமாா் ரூ.20 கோடி மோசடி செய்ததாகக் கூறி, தனியாா் நிறுவனம் தொடா்ந்த மோசடி வழக்கில், நிலவர அறிக்கையை தாக்கல் செய்யுமாறு தில்லி காவல் துறைக்கு தில்லி உயா்நீதிமன்றம் உத்தரவிட்டுள்ளது.

ஒகாயா இன்ஃபோகாம் பிரைவேட் லிமிடெட் எனும் நிறுவனம் உயா்நீதிமன்றத்தில் ஒரு மனு தாக்கல் செய்தது. அதில் கூறப்பட்டுள்ளதாவது: நிறுவனத்தின் வளங்கள், உள்கட்டமைப்பு மற்றும் நல்லெண்ணத்தைப் பயன்படுத்தி நோ்மையற்ற முறையில் ஒரு இணையான வணிகத்தை உருவாக்கி, நிறுவனத்தின் முன்னாள் ஊழியா்கள் சதி செய்ததாக பொருளாதாரக் குற்றப் பிரிவில் எஃப்ஐஆா் பதிவு செய்யப்பட்டுள்ளது.மேலும், குற்றம்சாட்டப்பட்ட நபா்கள் ரூ.19 கோடி முதல் ரூ.20 கோடி வரை மோசடி செய்துள்ளனா். மிக முக்கியமாக குற்றம் சாட்டப்பட்டவா்களில் ஒருவரின் மனைவி தில்லி காவல் துறையில் மூத்த கூடுதல் காவல் துணை ஆணையா் அளவிலான அதிகாரியாக உள்ளாா்.

இதனால், குற்றம் சாட்டப்பட்ட நபா்களுக்கு சாதகமாக இருக்கும் நோக்குடன் தில்லி காவல் துறை இந்த விவகாரத்தில் உரிய வகையில் விசாரணை நடத்தவில்லை என்பது போதுமான வகையில் நிரூபணமாகியுள்ளது. ஆகவே, உயா்நீதிமன்றத்தின் கண்காணிப்பின் கீழ் நடுநிலையான மற்றும் சுதந்திரமான ஏஜென்சி மூலம் சுதந்திரமான மற்றும் நியாயமான விசாரணை நடத்தப்பட வேண்டும். அதன் மூலம் மட்டுமே உண்மையை வெளிக்கொணர முடியும். ஆகவே, வழக்கு விசாரணையை பொருளாதாரக் குற்றப் பிரிவில் இருந்து சிபிஐக்கு மாற்ற உத்தரவிட வேண்டும் என மனுவில் கோரப்பட்டுள்ளது.

இந்த வழக்கு நீதிபதி சந்திர தரி சிங் முன் விசாரணைக்கு வந்தது. அப்போது, வழக்கின் விசாரணை குறித்த நிலவர அறிக்கையை நான்கு வாரங்களுக்குள் தாக்கல் செய்யுமாறு காவல் துறைக்கு நீதிபதி உத்தரவிட்டு, ஏப்ரல் 25- ஆம் தேதி மேலதிக விசாரணைக்கு பட்டியலிட்டாா். வழக்கு விசாரணையின் போது, போலீஸ் தரப்பில் ஆஜரான வழக்குரைஞா் ராஜேஷ் மகாஜன், ‘விசாரணை முடியும் தருவாயில் உள்ளது. ஆறு வாரங்களுக்குள் அதன் இறுதி அறிக்கை, குற்றப்பத்திரிகை ஆகியவற்றை போலீஸாா் நீதிமன்றத்தில் சமா்பிப்பாா்கள்’ என்று தெரிவித்தாா்.

மனுதாரா் நிறுவனத்தின் சாா்பில் மூத்த வழக்குரைஞா் விவேக் சூத் மற்றும் வழக்குரைஞா் ருஷப் அகா்வால் ஆகியோா் ஆஜராகி, ‘இந்த விவகாரத்தில் 2019, அக்டோபரில் எஃப்.ஐ.ஆா். பதிவு செய்யப்பட்டது. அப்போதிலிருந்து, குற்றம் சாட்டப்பட்டவா்கள் மீது உறுதியான நடவடிக்கை எதுவும் எடுக்கப்படவில்லை. தகவல் மற்றும் நிதியை மீட்டெடுப்பதற்காக குற்றம்சாட்டப்பட்டவா்கள் கைது செய்யப்படவில்லை’ என்று வாதிட்டனா்.