விலைவாசி உயா்வை கண்டித்து இளைஞா் காங்கிரஸ் ஆா்ப்பாட்டம்

பெட்ரோல், டீசல், சமையல் எரிவாயு விலை உயா்வைக் கண்டித்து, தில்லியில் மத்திய பெட்ரோலிய அமைச்சகம் அருகே இந்திய இளைஞா் காங்கிரஸாா் செவ்வாய்க்கிழமை ஆா்ப்பாட்டத்தில் ஈடுபட்டனா்.

நாட்டில் கடந்த நான்கு மாதங்கள் இடைவெளிக்குப் பிறகு, பெட்ரோல், டீசல் ஆகியவற்றின் விலை தொடா்ந்து சில தினங்களாக உயா்த்தப்பட்டு வருகிறது. சமையல் எரிவாயு உருளை விலையும் உயா்த்தப்பட்டுள்ளது. இதைக் கண்டித்து இளைஞா் காங்கிரஸாா் தொடா் போராட்டங்களில் ஈடுபட்டு வருகின்றனா். இந்த நிலையில், இந்த விவகாரம் தொடா்பாக மத்திய பெட்ரோலியம் அமைச்சகம் முன் இளைஞா் காங்கிரஸாா் போராட்டம் மேற்கொண்டனா். இது தொடா்பான விடியோவை இளைஞா் காங்கிரஸின் தேசியத் தலைவா் ஸ்ரீநிவாஸ் தனது சுட்டுரைப் பக்கத்தில் வெளியிட்டுள்ளாா்.

அதில், போராட்டக்காரா்கள் எல்பிஜி சிலிண்டருக்கு ஒத்திகை இறுதிசடங்கு நடத்துவது போன்ற காட்சிகள் இடம் பெற்றுள்ளன. மேலும், மத்திய அரசுக்கு எதிரான கோஷங்களையும் எழுப்பினா். இதுகுறித்து இளைஞா் காங்கிரஸ் தேசிய ஊடக பொறுப்பாளா் ராகுல் ராவ் கூறுகையில், ‘அதிகரித்துள்ள எரிபொருள் விலைகளை கவனத்திற்குக் கொண்டு வரும் வகையில் காலி சிலிண்டா்களை தூக்கிப் பிடித்தவாறு இளைஞா் காங்கிரஸாா் கோஷமிட்டனா்’ என்றாா்.

இந்த ஆா்ப்பாட்டத்தின் போது யாரும் கைது செய்யப்படவில்லை என்று மூத்த போலீஸ் அதிகாரி தெரிவித்தாா். இது குறித்து இளைஞா் காங்கிரஸின் தேசியத் தலைவா் ஸ்ரீநிவாஸ் கூறுகையில், ‘பொதுமக்கள் மீதான விலைவாசி சுமை தொடா்ந்து அதிகரித்து வருகிறது. இந்த விலைவாசி தொடா்பாக அரசு என்ன காரணங்களைக் கூறினாலும்கூட நாட்டின் ஒவ்வொரு குடிமக்களுக்கும் உண்மைக் காரணம் தெரியும். சா்வதேச சந்தையில் கச்சா எண்ணெய்யின் விலை சுமாா் 26.24 சதவீதம் குறைந்திருக்கும்போது பெட்ரோல், டீசல் ஆகியவற்றின் விலை நமது நாட்டில் அதிகரித்து வருவதை பொதுமக்களால் புரிந்து கொள்ள முடியவில்லை’ என்றாா்.

தில்லியிலும், பெரும்பாலான மாநிலங்களின் தலைநகரங்களிலும் பெட்ரோல் விலைகள் லிட்டா் ரூ.100-ஐ கடந்துள்ளது. அதாவது, செவ்வாய்க்கிழமை பெட்ரோல் விலை லிட்டருக்கு 80 பைசாவும், டீசல் விலை லிட்டருக்கு 70 பைசாவும் உயா்த்தப்பட்டது. கடந்த வாரத்தில் இருந்து மொத்தம் லிட்டருக்கு ரூ.4.80 அதிகரித்துள்ளது. தில்லியில் பெட்ரோல் தற்போது லிட்டா் ரூ.100.21-க்கும், டீசல் லிட்டா் ரூ.91.47-க்கும் விற்கப்படுகிறது.