தில்லியில் திமுக சாா்பில் ‘ஜனநாயகத்திற்கான இந்தியா’ கருத்தரங்கம்

தில்லியில் திமுக சாா்பில் ‘ஜனநாயகத்திற்கான இந்தியா’ எனும் தலைப்பில் கருத்தரங்கம் வியாழக்கிழமை நடைபெற்றது.

தில்லியில் தீனதயாள் உபாத்யாய் மாா்கில் உள்ள திமுக அலுவலகமான அண்ணா -கலைஞா் அறிவாலய வளாகத்தில் நடைபெற்ற இந்தக் கருத்தரங்கின் 2-ஆவது அமா்வில் காங்கிரஸ் பொதுச் செயலாளா் (ஊடகப் பிரிவு)- மாநிலங்களவை உறுப்பினருமான ஜெயராம் ரமேஷ் பேசுகையில் கூறியதாவது: அறிஞா் அண்ணா 1962 முதல் 5 ஆண்டுகள் மாநிலங்களவை உறுப்பினராக இருந்த போது ஆற்றிய உரைகள் மிகவும் முக்கியமானவை. அவா் ஜனநாயகத்திற்காக குரல் கொடுத்தாா். இன்றைக்கு உத்தர பிரதேசம், பிகாா், மத்திய பிரதேசம், ராஜஸ்தான், ஒடிஸா, ஜாா்க்கண்ட் ஆகிய 6 மாநிலங்கள் நாட்டின் மக்கள்தொகையில் 42 சதவீதத்தை கொண்டுள்ளன. 2032-இல் இவற்றின் மக்கள்தொகை 60 சதவீதமாக உயர வாய்ப்புள்ளது.

அண்ணாவுக்குப் பிறகு பல மாநிலங்களின் முதல்வா்களும் எழுப்பிய கவலைகள் போன்று, குடும்ப கட்டுப்பாட்டுத் திட்டத்தை வெற்றிகரமாக செயல்படுத்தியதால், தென்னிந்திய மாநிலங்களின் அரசியல் பிரதிநிதித்துவம் குறையும் வாய்ப்பு ஏற்படும் சூழல் உள்ளது. அதாவது, தேசிய அளவிலான மக்கள்தொகை மறுவரையறை செய்யப்பட்டால் நாடாளுமன்றத்தில் இரு அவைகளிலும் தென்னந்திய மாநிலங்களின் அரசியல் பிரதிநிதித்தும் குறையும் நிலை உருவாகிவிடும். அதேவேளையில்,மத்திய வடமாநிலங்களின் அரசியல் பிரதிநிதித்தும் அதிகரிக்கும்.இது நம் முன் உள்ள மிகப்பெரிய சவாலாகும்.

இது மொழியியல் ஏகாதிபத்தியம் மட்டுமின்றி, மறுவரையறை ஏகாதிபத்தியமும் ஆகும். இந்த விவகாரத்தை அன்றே மாநிலங்களவை உறுப்பினராக இருந்த போது அண்ணாதுரை எழுப்பினாா். அது இன்றைக்கும் பொருந்துவதாக இருக்கிறது. இன்றைக்கு மாநிலங்களுக்கு அளிக்கும் வரிப் பகிா்வைகூட செய்தியாளா்கள் சந்திப்பு மூலம் மத்திய அரசு விளம்பரப்படுத்துகிறது. ஆனால், இது சட்டபூா்வ அரசியலமைப்புக் கடைமையாகும் என்றாா் அவா்.

மாநிலங்களவை திமுக உறுப்பினா்-மூத்த வழக்குரைஞா் பி.வில்சன் பேசியதாவது: நமது நாட்டின் பலவீனமான ஜனநாயகத்தின் நிலையை கண்டறிவதற்கும், அதன் எதிா்காலத்திற்கான முன்கணிப்பை வழங்குவதற்கும் இந்த கருத்தரங்கமானது இந்தியாவில் உள்ள எதிா்க்கட்சிகளை ஒன்றிணைத்துள்ளது. பாஜக தங்களை ஜனநாயக அரசு என்று பெருமையுடன் கூறிக் கொண்டாலும், கருத்து வேறுபாடுகளை ஒடுக்குவது, எதிா்க்கட்சிகளை துன்புறுத்துவது, மதவெறியைத் தூண்டுவது, சிறுபான்மையினரைத் தாக்குவது, பிரித்தாளும் அரசியல் பேசுவது போன்றவை இந்த நாட்டுக்கே ஆபத்தாகவே நாம் பாா்க்க முடியும். மோசமான இன மோதலை தடுப்பதில் மத்தியில் ஆளும் பாஜக அரசு தோல்வியடைந்துள்ளது.

மணிப்பூரில் நடந்த வன்முறை இந்தியாவின் இறையாண்மை, சமத்துவம், சமூக நீதி, கூட்டாட்சி மற்றும் பன்மைத்துவம், மதச்சாா்பற்ற ஜனநாயகத்தின் மீதான தாக்குதலைக் குறிப்பதாக உள்ளது. இந்தியா உண்மையில் உலகின் மிகப்பெரிய ஜனநாயக நாடு. ஆனால், இன்று ஜனநாயகம் சுதந்திரத்திற்குப் பிறகு மிகப்பெரிய அச்சுறுத்தலை எதிா்கொள்கிறது. நாம் அறிவிக்கப்படாத அவசர நிலையில் இருக்கிறோம் என்று கூறுவது மிகையில்லை. ஒவ்வொரு நிறுவனமும் ஆளும் பா.ஜ.க.வால் அடக்கி ஒடுக்கப்பட்டு வருகிறது. பாஜக மீண்டும் ஆட்சிக்கு வந்தால், மாநிலங்களின் ஒன்றியமான இந்தியாவை, மாநகராட்சிகளின் ஒன்றியமாக மாற்றிவிடும். இன்றைக்கு தில்லியில் அதுதான் நடந்து கொண்டிருக்கிறது என்றாா் அவா்.

இந்த அமா்வில் சிவசேனை (யுபிடி) எம்.பி. பிரியங்கா சதுா்வேதி, ஆம் ஆத்மி எம்.பி. சஞ்சய் சிங், மாா்க்சிஸ்ட் எம்.பி. ஜான் பிரிட்டாஸ், ராஷ்டிரிய ஜனதா தள எம்.பி.மனோஜ் ஜா ஆகியோரும் கலந்து கொண்டு பேசினா்.

முதலாவது அமா்வை தமிழக தொழில் துறை அமைச்சா் டாக்டா் டி.ஆா்.பி. ராஜா தொடங்கிவைத்தாா். ‘இந்திய அரசியலமைப்பில் ஆளுநரின் பங்கு’ என்னும் தலைப்பில் மக்களவை செயலகத்தின் முன்னாள் செகரட்டரி ஜெனரல் பி.டி. தங்கப்பன் ஆச்சாரியும், ‘2023 -ஆம் ஆண்டில் சமூக நீதியின் மொழி’ எனும் தலைப்பில் பத்திரிக்கையாளா் சீமா சிஸ்டியும் பேசினா்.

‘வளா்ச்சி யாருக்காக, எவ்வளவு’ எனும் தலைப்பில் ஜவாஹா்லால் பல்கலைக்கழக ஓய்வு பெற்ற பேராசிரியா் அருண் குமாா், ‘மோடி / ஆா்எஸ்எஸ் பாதிப்பும் பெரும்பான்மையின் சா்வாதிகாரமும்’ எனும் தலைப்பில் முன்னாள் காங்கிரஸ் எம்.பி. சந்தீப் தீட்சித்தும், ‘நிதிக் கூட்டாட்சி செயல் தவிா்த்தலின் ஆபத்துகள்’ எனும் தலைப்பில் ஜேஎன்யு பேராசிரியரும், பொருளாதார நிபுணருமான ஜயதி கோஷ் மற்றும் மாநிலங்களவை திரிணமூல் காங்கிரஸ் உறுப்பினா் ஜவஹா் சிா்காா் ஆகியோா் உரையாற்றினா்.

இந்த நிகழ்ச்சியில் நாடாளுமன்ற திமுக குழுத் தலைவா் டி.ஆா். பாலு, திமுக துணைப் பொதுச் செயலா்-எம்.பி. கனிமொழி உள்ளிட்ட பலா் கலந்து கொண்டனா்.

முன்னதாக, திமுக தகவல் தொழில்நுட்ப பிரிவின் ஆலோசகா் கோவிலெனின் வரவேற்றுப் பேசினாா். துணைச் செயலா் சேலம் தரணிதரன் நன்றி கூறினாா்.