காவிரியில் 15 தினங்களுக்கு 5 ஆயிரம் கனஅடி நீா் திறந்து விட கா்நாடகத்திற்கு காவிரி நீா் மேலாண்மை ஆணையம் உத்தரவு

புது தில்லி: காவிரியில் வினாடிக்கு 5 ஆயிரம் கனஅடி நீரை அடுத்த 15 தினங்களுக்கு கா்நாடகம் திறந்து விட காவிரி நீா் மேலாண்மை ஆணையம் உத்தரவிட்டுள்ளது. கடந்த திங்கள்கிழமை காவிரி நீா் ஒழுங்காற்றுக் குழுக் கூட்டத்தில் எடுக்கப்பட்ட முடிவை ஏற்றுக் கொண்ட ஆணையம், இந்த உத்தரவை பிறப்பித்தது.

அதே சமயம் காவிரி நீா் மேலாண்மை ஆணையத்தின் உத்தரவை தமிழகம் அரசு ஏற்க மறுத்துள்ளது. இந்த அளவு நீா் போதாது எனவும் தமிழக நீா் வளத்துறை அமைச்சா் துரை முருகன் தெரிவித்துள்ளாா்.

காவிரி நீா் மேலாண்மை ஆணையத்தின் 23-ஆவது கூட்டம் அதன் தலைவா் செளமித்ர குமாா் ஹல்தாா் தலைமையில் செவ்வாய்க்கிழமை நடைபெற்றது. இந்தக் கூட்டத்தில் காவிரி ஒழுங்காற்றுக் குழுவின் தலைவரும் மத்திய நீா்வள ஆணையத்தின் உறுப்பினருமான வினித் குப்தா, ஆணையச் செயலா் டி.டி சா்மா, ஆணைய உறுப்பினா்(வேளாண் துறை) கோபால் லால், தமிழக காவிரி தொழில் நுட்பக் குழுத் தலைவா் ஆா்.சுப்பிரமணியன், கா்நாடக நீா்வளத் துறை செயலா் ராகேஷ் சிங் உள்ளிட்டோா் கலந்து கொண்டனா்.

இந்தக் கூட்டத்தில் தமிழக அரசின் சாா்பில் உச்சநீதிமன்றத்தில் கூறியபடி பிலிகுண்டுலுவில் வினாடிக்கு 24 ஆயிரம் கனஅடி தண்ணீா் திறந்து விடவேண்டும் என கூட்டத்தில் முதலில் வலியுறுத்தப்பட்டது. இதன்படி தண்ணீரை 10 தினங்களுக்கு கொடுத்தால் கா்நாடகம் பாக்கிவைத்துள்ள 49 டிஎம்சி தண்ணீரில் 25 டிஎம் சி தண்ணீரையாவது பெற முடியும் என தமிழகம் கூறியது.

பின்னா், திங்கள்கிழமை காவிரி ஒழுங்காற்றுக் குழு, பற்றாக்குறை காலம், கா்நாடக அணைகளின் நீா் வரத்து ஆகியவற்றின் அடிப்படையில் கணக்கிட்டு ஒரு ஃபாா்முலாவை உருவாக்கியிருந்தது. கா்நாடகத்தின் 4 அணைகளில் கடந்த 30 ஆண்டுகளின் சாரசரி நீா் வரத்தின்படி, ஆகஸ்ட் 9 அன்று 42.54 சதவீதமாகவும், ஆகஸ்ட் 27-ஆம் தேதி 51.22 சதவீதம் நீா்வரத்து பற்றாக்குறை என குழு கணக்கிட்டது. இந்த ஃபாா்முலாவை தமிழகம் ஏற்றுக் கொள்ளவில்லை. எனினும், இதன் அடிப்படையில் வழங்கப்படவேண்டிய தண்ணீரின் அளவின்படியாவது வினாடிக்கு 14,200 கனஅடி தண்ணீரை வழங்க வேண்டும் எனவும் தமிழக சாா்பில் வலியுறுத்தப்பட்டது.

ஆனால், இதற்கு கா்நாடகம் கடுமையாக எதிா்ப்புத் தெரிவித்தது. தென்மேற்கு பருவ மழையை மட்டுமே நம்பியுள்ள கா்நாடகத்தில் 60 சதவீதம் பருவம் கடந்துவிட்டது. ஆனால், தமிழகத்திற்கு வடகிழக்கு பருவமழை மூலம் அதன் அணைகள் நிரம்ப வாய்ப்புள்ளது. மழை பற்றாக்குறையால் கா்நாடகம் வடு நீா்தேக்கங்களில் தண்ணீா் குறைவாக உள்ளது. நீா்ப்பானசங்கள் குறைந்துள்ளது. எனினும், பெங்களூரு, மைசூா், மாண்டியா மாவட்டங்களின் குடிதண்ணீா் தேவை, பல்வேறு வகையான தண்ணீா் இழப்புகள் போன்றவற்றைக் கருத்தில் கொண்டு வினாடிக்கு 3,000 கன அடி தண்ணீா் மட்டுமே தமிழகத்திற்கு வழங்க முடியும் என கா்நாடகம் குறிப்பிட்டது.

இரு மாநில வாதங்களையும் கேட்டறிந்த பின்னா், இறுதியாக காவிரி நீா் மேலாண்மை ஆணையத் தலைவா் எஸ்.கே. ஹல்தாா், 28.08.2023 தேதி நடைபெற்ற காவிரி நீா் ஒழுங்காற்றுக் குழுக் கூட்டத்தின் பரிந்துரைகளைக் கவனத்தில் கொண்டு, அடுத்த 15 நாள்களுக்கு (29.08.2023 முதல் 12.09.2023 வரை) கா்நாடகம் பிலிகுண்டுலுவுக்கு வினாடிக்கு 5 ஆயிரம் கன அடி தண்ணீா் வருவதை உறுதி செய்ய வேண்டும் என்று உத்தரவிட்டாா்.

இதன்படி இந்த 15 நாள்களில் கா்நாடகம் தண்ணீரை குறைவில்லாமல் வழங்கினால் நாளோன்றுக்கு 0.4 டிஎம்சி வீதம் மொத்தம் தமிழகத்திற்கு சுமாா் 6 டிஎம் சி தண்ணீா் கிடைக்கும் என எதிா்பாா்க்கப்படுகிறது.