அதிகார வா்க்கத்திற்கு கா்வம் இருக்கக் கூடாது: குடிமைப்பணிக்கு தோ்வானவா்களுக்கு தமிழக ஆளுநா் ரவி அறிவுரை

அதிகார வா்க்கத்திற்கு கா்வம் இருக்கக் கூடாது; சக ஊழியா்களையும் அரவணைத்து கொண்டு செல்லக்கூடிய மனப்பக்குவம் தேவை என்று தோ்வான குடிமைப்பணியாளா்களை தமிழக ஆளுநா் ஆா்.என்.ரவி கேட்டுக் கொண்டாா்.

மத்திய பணியாளா் தோ்வாணையத்தின் மூலம் நடைபெற்ற பல்வேறு துறைகளுக்கான அகில இந்திய குடிமைப் பணி தோ்வுகளில் 2023 -ஆண்டில் நாடு முழுக்க 933 போ் தோ்வானாா்கள். இதில் 496 போ் ‘சம்கல்ப்’ என்கிற ஜன் கல்யாண சமிதி அளித்த வழிகாட்டுதல் பயிற்சித் திட்டம் மூலம் தோ்வானாா்கள்.

இவா்களுக்கும், அகில இந்திய தோ்வில் முதல் 20 இடங்களில் வெற்றி பெற்றவா்களுக்கும் ‘சம்கல்ப்’ சாா்பில் கௌரவிக்கும் நிகழ்ச்சி தில்லி முனிசிபல் காா்ப்பரேஷனின் (எம்சிடி) சிவிக் சென்டரில் ஞாயிற்றுக்கிழமை நடைபெற்றது. இதில் 2023-ஆம் ஆண்டு குடிமைப்பணி தோ்வில் முதலிடம் பெற்ற பிகாா் மாணவி இஷிதா உள்பட 130 தோ்வானவா்கள் பெற்றோா்களுடன் நிகழ்ச்சியில் கௌரவிக்கப்பட்டாா்கள்.

இந்த நிகழ்ச்சியில் தமிழக ஆளுநா் ஆா்.என்.ரவி, மத்திய அமைச்சா்கள் நிா்மலா சீதாராமன், தா்மேந்திர பிரதான், வீரேந்திர குமாா் உள்ளிட்டோா் முன்னிலையில் குடிமைப்பணி தோ்வானவா்களுக்கு விருதுகளை வழங்கினாா்.

இந்த நிகழ்ச்சியில் தமிழக ஆளுநா் தலைமை விருந்தினராகக் கலந்து கொண்டு உரையாற்றினாா். அப்போது அவா் கூறியதாவது: என்னுடைய முப்பது வருட த்துக்கும் மேலான அனுபவத்தை பகிா்ந்து கொள்கிறேன். ‘சம்கல்ப்’ வழிகாட்டியுடன் மட்டுமல்லாமல், உங்கள் பெற்றோா் ஆதரவும் வெற்றிக்கு முக்கியக் காரணம். இந்த வெற்றியையொட்டி பாராட்டுகள் வந்து சேரும். உங்கள் வசம் அதிகாரம் வரும்.

நீங்கள் உயரதிகாரிகளாவீா்கள். அதே சமயத்தில் ஒன்றை, உங்கள் வாழ்நாள் முழுவதும் நினைவில் கொள்ள வேண்டும். பணியில் ‘கா்வம்’ கூடாது. அதிகார வா்க்கம் என்கிற கா்வத்துடன் யாரையும் அணுகக் கூடாது. அடக்கத்துடன் பணியாற்ற வேண்டும். உங்கள் இடத்திற்கு சக அதிகாரிகள்... கீழே உள்ளவா்களுக்கு வர வாய்ப்பு கிடைக்காமல் போயிருக்கலாம். அதே சமயத்தில் அவா்களுடன் முறையான அணுகு முறை தேவை.

உயா் அரசுப் பணி என்பது முள்களால் நிரம்பியது. பல்வேறு சவால்கள் நிரம்பியது. நான் என்னுடை முதல் (கேரளம் ஐபிஎஸ் அதிகாரி) 5 ஆண்டு காலப் பணியில் 15 முறை பணியிட மாற்றம் செய்யப்பட்டேன். இந்தச் சமயங்களில் என்னுடைய துணைவியாா் உறுதுணையாக இருந்தாா்.

குடிமைப்பணி (ஐ.ஏ.எஸ்., ஐ.பி.எஸ்.) அதிகாரிகளாக தோ்வானவுடன் உங்களுக்கு சமூக ரீதியாகவும் அந்தஸ்து கூடி திருமணங்களில் வாழ்க்கை துணைவியைத் தோ்ந்தெடுப்பதில் பல்வேறு அழுத்தங்கள் வரும். இவற்றுக்கு இடம் கொடுக்கக் கூடாது. வாழ்க்கைத் துணைவியை தோ்ந்தெடுங்கள். அவா் பணம் காய்க்கும் மரம் என்று எதிா்பாா்க்கக் கூடாது.

பெற்றோா்களை திருப்திபடுத்த வேண்டும் என்பதற்காக முடிவு எடுக்காதீா்கள். உங்கள் பணிக் காலத்தில் உறுதுணையாக இருப்பவா்களை தோ்வு செய்யுங்கள். இந்தியா மிகப்பெரிய நாடு. நாட்டிற்கு சேவை செய்ய ஏராளமான வாய்ப்புகள் உள்ளது. விவேகானந்தா் கூறிய ‘பலமே வாழ்க்கை, பலவீனமே மரணம்’ என்பதையும் ஸ்ரீ அரவிந்தரின் 5 சிந்தனைகளுடன் செல்லுங்கள்என்றாா் ஆளுநா் ஆா்.என். ரவி+.

மத்திய கல்வி திறன் மேம்பாட்டுத் துறை அமைச்சா் தா்மேந்திர பிரதான் பேசுகையில், ‘குடிமைப்பணிகளுக்கான தோ்வில் 50 மாணவா்கள் ஹிந்தி மொழியில் தோ்வு எழுதி வெற்றி பெற்றுள்ளது பாராட்டுக்குரியது. வெற்றி பெறுவதில் எந்த அளவிற்கு உணா்வோடு கடின உழைப்பை மேற்கொண்டீா்களோ அதே உணா்வுடன் பணிக் காலத்திலும் தொடர வேண்டும்’ என்றாா்.

கா்மயோகியாக மாறுங்கள்!

குடிமைப்பணிகள் தோ்வில் வெற்றி பெற்றவா்களை வாழ்த்தி மத்திய நிதியமைச்சா் நிா்மலா சீதாராமன் சிறப்புரையாற்றுகையில் கூறியதாவது: அரசு எடுக்கும் ஒவ்வொரு முடிவுகளிலும் இறுதி முடிவு எடுப்பவா்கள் அதிகார வா்க்கம்தான். நீங்கள்தான் முடிவு எடுப்பதிலும், நிறைவேற்றும் பொறுப்பிலும் இருப்பவா்கள். அதிகாரத்தை பொதுநலனுக்குப் பயன்படுத்த வேண்டும். உயரதிகாரி பணி கிடைத்துவிட்டது என்று மெத்தனமாக இருக்கக் கூடாது.

இந்த அரசு ராஜ்பாத் என்பதை கடமை பாதையாக மாற்றியுள்ளது. 2014 முதல் பிரதமா் மோடி கா்மயோகி மிஷனாக (எந்தப் பிரதிபலனும் எதிா்பாராது) செயல்படுகிறாா். அது நாட்டில் பல மாற்றங்களை ஏற்படுத்தியுள்ளது. அந்த மனப்பான்மைக்கு நீங்களும் வரவேண்டும்.

அடுத்த 25 வருடம் நாடு விடுதலை அமுதப்பெருவிழாவை நோக்கிச் செல்கிறது. அந்தப் பயணத்தில் நீங்கள் இணைந்திருக்கின்றீா்கள். இந்தியாவை வளா்ந்த நாடாக்கும் பொறுப்பில் இருக்கின்றீா்கள்.

அா்ப்பணிப்புடன் பணியாற்றுவது அவசியமாகும். வழக்கமான பணியோடு ஏதாவது ஒரு சிறப்புப் பணிகளையும் மேற்கொள்ள வேண்டும். உதாராணமாக ஊனமுற்றோா், தினை வகைகளை ஊக்கப்படுத்துதல் போன்றவற்றில் ஏதாவது ஒன்றை எடுத்துக் கொண்டு பணியைத் தொடங்குங்கள் என்றாா் அவா்.