பள்ளி விழாவில் மனீஷ் சிசோடியாவை நினைத்துகண் கலங்கிய முதல்வா் கேஜரிவால்!

தேசியத் தலைநகா் தில்லியில் உள்ள பவானாவில் டாக்டா் பி.ஆா்.அம்பேத்கா் சிறப்பு பள்ளியின் புதியக் கிளையை புதன்கிழமை தொடங்கி வைத்த முதல்வா் அரவிந்த் கேஜரிவால், முன்னாள் துணை முதல்வரும், கல்வி அமைச்சருமான மனீஷ் சிசோடியாவை நினைவுகூா்ந்து கண் கலங்கினாா்.

பி.ஆா்.அம்பேத்கா் சிறப்பு பள்ளியின் புதிய கிளை தொடக்க விழா நிகழ்ச்சியில் முதல்வா் கேஜரிவால் பங்கேற்றுப் பேசியதாவது: பவானாவில் பி.ஆா்.அம்பேத்கா் சிறப்பு பள்ளியின் புதியக் கிளைத் திறக்கப்பட்டுள்ளது. அனைவருக்கும் தரமான கல்வி வழங்க வேண்டும் என்ற நோக்கில் முன்னாள் துணை முதல்வா் மனீஷ் சிசோடியா முதன் முதலில் இந்தத் சிறப்பு பள்ளித் திட்டத்தைத் தொடங்கினாா்.

மனீஷ் சிசோடியா இன்று இந்த நிகழ்ச்சியில் இல்லை. அவா்கள் அவா் மீது பொய் வழக்குகளைப் போட்டு நியாயமற்ற முறையில் சிறையில் அடைத்தனா். மனீஷ் சிசோடியா பொய்யான குற்றச்சாட்டின் பேரில் சிறையில் அடைக்கப்பட்டுள்ளாா். அவருக்கு விரைவில் ஜாமீன் வழங்கப்படும்.

மணீஷ் சிசோடியா சிறையிலிருந்து விரைவில் வெளியே வருவாா் என்று நான் நம்புகிறேன். உண்மை எப்போதும் வெல்லும். அவா் நல்ல பள்ளிகளை அமைத்து வந்ததால் சிறையில் அடைக்கப்பட்டுள்ளாா் என்றாா்.

மேலும், பாஜக மீது மறைமுகத் தாக்குதலைத் தொடுத்த கேஜரிவால், ‘தில்லியின் கல்வி வளா்ச்சியை அவா்கள் நிறுத்த விரும்புகிறாா்கள். தில்லியின் கல்விப் புரட்சியை முடிவுக்கு வர வேண்டும் என்று அவா்கள் (பாஜக) விரும்புகிறாா்கள். ஆனால், நாங்கள் அதை நடக்க விடமாட்டோம். உலகம் முழுவதும் உள்ள அனைவா் மத்தியிலும் தில்லியின் அரசுப் பள்ளிகள் அனைத்தும் சிறந்தவை என்ற கருத்து உள்ளது’ என்று கேஜரிவால் கூறினாா். இந்நிகழ்ச்சியில் மனீஷ் சிசோடியா குறித்து பேசும்போது அவரைத் நினைத்து முதல்வா் கேஜரிவால் கண்கலங்கினாா்.