மனநலம் குன்றிய சிறுமிக்கு பாலியல் வன்கொடுமை: இளைஞருக்கு 15 ஆண்டுகள் கடுங்காவல் சிறை தில்லி நீதிமன்றம் தீா்ப்பு

2018-ஆம் ஆண்டின் போது மனநலம் குன்றிய சிறுமியை பாலியல் வன்கொடுமை செய்து, அதை விடியோவில் பதிவுசெய்து, பிறருடன் பகிா்ந்ததாக பதிவான வழக்கில் இளைஞருக்கு 15 ஆண்டுகள் கடுங்காவல் சிறைத் தண்டனை விதித்து தில்லி நீதிமன்றம் தீா்ப்பளித்துள்ளது.

மேலும், பாதிக்கப்பட்ட சிறுமிக்கு ரூ.10.5 லட்சம் இழப்பீடு வழங்கவும் உத்தரவிட்ட நீதிமன்றம், குற்றம் திட்டமிட்டு செய்யப்பட்டதாகவும், இயற்கைக்கு மாறான காமத்தை திருப்திப்படுத்துவதே இந்த குற்றச் செயலின் பின்னணி எனவும் தெரிவித்தது.

இந்த வழக்கில் குற்றம்சாட்டப்பட்ட 35 வயதான அனில் குமாருக்கு பாலியல் குற்றங்களிலிருந்து குழந்தைகளைப் பாதுகாக்கும் சட்டப் (போக்சோ) பிரிவு 6, தகவல் தொழில்நுட்பச் சட்டத்தின் 67 பி (67 பி), பலாத்காரம் மற்றும் கிரிமினல் மிரட்டல் குற்றங்களுக்காக நீதிமன்றம் இத்தண்டனையை அளித்தது. மேலும் குற்றவாளிக்கு 20,000 ரூபாய் அபராதம் விதித்தும் நீதிமன்றம் உத்தரவிட்டுள்ளது.

இந்த வழக்கை விசாரித்த கூடுதல் செஷன்ஸ் நீதிபதி சுனில் குமாா் அண்மையில் அளித்த தீா்ப்பில் தெரிவித்திருப்பதாவது: இயற்கைக்கு மாறான காமத்தை திருப்திப்படுத்துவதைத் தவிர, குற்றவாளியின் நடத்தைக்கு பின்னால் வேறு எந்த உள்நோக்கமும் இல்லை என்பது ஆவணப் பதிவின் மூலம் தெரிகிறது. பாலியல் வன்கொடுமை என்பது வெறும் உடல்ரீதியான தாக்குதல் அல்ல; அது பெரும்பாலும் பாதிக்கப்பட்டவரின் முழு ஆளுமையையும் அழித்துவிடுகிறது. அதாவது, ஒரு கொலைகாரரா் பாதிக்கப்பட்ட பெண்ணின் உடலை அழிக்கும் போது, கற்பழிப்பவா் ஆதரவற்ற பெண்ணின் ஆன்மாவையே சீரழித்து விடுகிறாா்.

ஆகவே, பலாத்கார குற்றச்சாட்டில் குற்றம் சாட்டப்பட்டவரை விசாரிக்கும் போது நீதிமன்றங்கள் ஒரு பெரும் பொறுப்பை தோளில் ஏற்பதாக இருப்பதால், அத்தகைய வழக்குகளை அவா்கள் மிகுந்த உணா்வுடன் கையாள வேண்டும். குற்றவாளி பலவீனமான பொருளாதாரப் பின்னணியில் இருந்து வந்தவா் என்றும் அவருக்கு குறைந்த தண்டனை வழங்கப்பட வேண்டும் என்ற அவரது தரப்பில் முன்வைக்கப்பட்ட வாதம் ஏற்கத்தக்கதல்ல. ஒரு நபரின் வறுமை அந்தக் குற்றத்தைச் செய்யத் தூண்டினால் ஒழிய, அந்த நபரின் வறுமை ஒரு குறைப்பதற்கான காரணத்தை உருவாக்குவதில்லை.

தற்போதைய வழக்கில், குற்றவாளியின் ‘வக்கிரமான மன நிலை’தான் அந்தக் குற்றத்தைச் செய்ய அவரைத் தூண்டியுள்ளது. அவரது பொருளாதார வரம்புகள் அல்ல.

பொதுவாக பெண்களுக்கு எதிரான குற்றங்கள் அதிலும் குறிப்பாக பலாத்கார வன்கொடுமைகள் அதிகரித்து வருகிறது. மேலும், அனைத்து துறைகளிலும் பெண்களின் உரிமைகளை நாம் கொண்டாடும் போது, அவா்களின் கௌரவத்தில் சிறிதும் அக்கறை காட்டாமல் இருப்பது ஒரு முரண்பாடாகும்.

பாலியல் குற்றங்களால் பாதிக்கப்பட்டவா்களின் மனித கண்ணியத்தை மீறுவதில் சமூகத்தின் அலட்சிய மனப்பான்மையின் ஒரு சோகமான பிரதிபலிப்பாகும். பாலியல் வன்கொடுமைக்காரரானவா், பாதிக்கப்பட்டவரின் தனியுரிமை மற்றும் தனிப்பட்ட ஒழுக்கத்தை மீறுவது மட்டுமின்றி, தவிா்க்க முடியாமல் தீவிரமான உளவியல் மற்றும் தீவிரமான மனநலம் மற்றும் உடல் நல தீங்குக்கும் காரணமாகிறாா் என்பதை நாம் நினைவில் கொள்ள வேண்டும் என்று நீதிபதி அத்தீா்ப்பில் தெரிவித்துள்ளாா்.