கேஜரிவாலின் உடல் எடை 2 கிலோ குறைந்துள்ளது: திகாா் சிறை நிா்வாக வட்டாரங்கள் தகவல்

நமது நிருபா்

புது தில்லி: சிறையில் தில்லி முதல்வா் அரவிந்த் கேஜரிவாலின் உடல் எடை 2 கிலோ வரை குறைந்துள்ளதாகவும், அவரது உடல்நிலையை எய்ம்ஸ் மருத்துவக் குழுவினா் தொடா்ந்து கண்காணித்து வருவதாகவும் திகாா் சிறை நிா்வாக வட்டாரங்கள் திங்கள்கிழமை தகவல் தெரிவித்துள்ளது.

தில்லி முதல்வா் அரவிந்த் கேஜரிவால் திகாா் சிறையில் 8.5 கிலோ வரை எடை குறைந்துள்ளதாக ஆம் ஆத்மி கட்சித் தலைவா்கள் குற்றஞ்சாட்டி வந்த நிலையில், அவரது உடல்நிலை தொடா்பான அறிக்கையை சிறை நிா்வாகம் தில்லி அரசின் உள்துறைக்கு கடிதமாக அனுப்பியுள்ளது.

இக்கடிதத்தில் உள்ள சாராம்சங்கள் குறித்து திகாா் சிறை நிா்வாகத்தின் வட்டாரங்கள் கூறியிருப்பதாவது: முதல்வா் அரவிந்த் கேஜரிவாலின் உடல்நிலை தொடா்பாக ஆம் ஆத்மி கட்சியைச் சோ்ந்த தலைவா்கள் மற்றும் தில்லி அரசு அமைச்சா்கள் பொதுமக்களைக் குழப்பி, தவறாக வழிநடத்துகின்றனா். முதல்வா் கேஜரிவால் திகாா் சிறைக்கு கடந்த

ஏப்ரல் 1-ஆம் தேதி வந்தபோது, அவரது உடல் எடை 65 கிலோவாக இருந்தது. தொடா்ந்து ஒரு வாரத்திற்குப் பின்னா், ஏப்ரல் 8-ஆம் தேதி முதல் ஏப்ரல் 29-ஆம் தேதி வரை அவா் 66 கிலோ உடல் எடையுடன் இருந்தாா். உச்சநீதிமன்றம் வழங்கிய 21 நாள் இடைக்கால ஜாமீன் முடிந்து, ஜூன் 2-ஆம் தேதி முதல்வா் கேஜரிவால் சிறைக்குத் திரும்பிய போது, அவரது உடல் எடை 63.5 கிலோவாக இருந்தது. கடந்த ஞாயிற்றுக்கிழமை (ஜூலை 14) அவரது உடல் எடை 61.5 கிலோவாக உள்ளது. எனவே, அவா் 2 கிலோ வரை எடை குறைந்துள்ளாா்.

கேஜரிவாலுக்கு மூன்று வேளையும் வீட்டில் சமைத்த உணவே வழங்கப்படுகிறது. ஆனால், அவா் கடந்த ஜூன் 3-ஆம் முதல் உணவில் பகுதி அளவை உண்ணாமல் திருப்பித் தருகிறாா். எய்ம்ஸ் மருத்துவக் குழு அவரைத் தொடா்ந்து கண்காணித்து வருகிறது. அவரது மனைவி சுனிதா கேஜரிவால் சிறை நிா்வாகத்துடன் தொடா்ந்து தொடா்பில் இருக்கிறாா்.

கேஜரிவாலின் உடல்நிலை குறித்த ஆம் ஆத்மி கட்சியின் குற்றச்சாட்டுகளை நிராகரித்தே, திகாா் சிறை நிா்வாகம் தில்லி அரசின் உள்துறைக்கு கடிதம் எழுதியுள்ளது என்று அந்தா வட்டாரங்கள் தெரிவித்தன.

சஞ்சய் சிங் குற்றச்சாட்டு: முதல்வா் அரவிந்த் கேஜரிவால் உடல் எடை குறைந்துள்ளதை திகாா் சிறை அதிகாரிகள் ஏற்றுக் கொண்டுள்ளனா் என்று மாநிலங்களவை ஆம் ஆத்மி எம்.பி. சஞ்சய் சிங் தெரிவித்தாா்.

மேலும் அவா் கூறியிருப்பதாவது: கேஜரிவாலை சிறையில் அடைத்து, அவரது உடல்நிலைக்கு கேடு விளைவிக்க பாஜக சதி செய்கிறது. முதல்வா் கேஜரிவால் சிறையில் கடுமையான நீரிழிவு நோயால் பாதிக்கப்பட்டுள்ளாா். ஆனால், அவருக்குத் தேவையான மருத்துவ வசதிகளை சிறை நிா்வாகம் அளிக்கவில்லை. கேஜரிவாலின் சா்க்கரை அளவு பல மடங்கு

குறைந்துள்ளது. அவா் உடல் எடை குறைந்துள்ளதையும் திகாா் சிறை நிா்வாக அதிகாரிகள் ஒப்புக்கொண்டுள்ளனா். முதல்வா் கேஜரிவால் தூங்கும்போது சா்க்கரை அளவு கடுமையாகக் குறைந்தால், அவா் கோமா நிலைக்குச் செல்லலாம் அல்லது மூளைச்சாவு அடையும் அபாயமும் உள்ளது என்றாா் அவா்.