துவாரகாவில் வீட்டில் தீ விபத்து: ஒரே குடும்பத்தை சோ்ந்த 4 போ் மூச்சுத்திணறி சாவு

புது தில்லி: தில்லி துவாரகாவின் பிரேம் நகா் பகுதி வீட்டில் செவ்வாய்க்கிழமை ஏற்பட்ட தீ விபத்தில் ஒரே குடும்பத்தைச் சோ்ந்த 4 போ் மூச்சுத் திணறி

உயிரிழந்ததாக தில்லி தீயணைப்புத் துறையினா் செவ்வாய்க்கிழமை தெரிவித்தனா். பிரதான இரும்புக் கதவு உள்பக்கமாக பூட்டப்பட்டிருந்ததால் மீட்பு நடவடிக்கையில் தீயணைப்புத் துறையினா் சிரமத்தை எதிா்கொண்டனா்.

இதுகுறித்து தில்லி தீயணைப்புத் துறை அதிகாரி ஒருவா் கூறியதாவது:

பிரேம் நகரில் வீட்டில் ஏற்பட்ட தீ விபத்து குறித்து செவ்வாய்க்கிழமை அதிகாலை 3.30 மணியளவில் தீயணைப்புத் துறைக்கு தகவல் வந்தது. இதைத் தொடா்ந்து, இரண்டு தீயணைப்பு வாகனங்கள் சம்பவ இடத்திற்கு அனுப்பப்பட்டன.

பேட்டரி இன்வொ்ட்டரில் தீ விபத்து ஏற்பட்டு, அது இரண்டு மாடி கட்டடத்தின் முதல் தளத்தில் அருகிலுள்ள சோபாவில் பரவியது. இதனால், வீட்டிலிருந்த நான்கு போ் புகையை சுவாசிக்க நோ்ந்தது என்று அந்த அதிகாரி தெரிவித்தாா்.

இதுகுறித்து போலீஸாா் கூறுகையில், ‘பிரதான வாயில் உள்ளே இருந்து பூட்டப்பட்டிருந்தது. தீயணைப்பு வீரா்கள் அதை உடைத்துச் சென்று உள்ளே சிக்கியிருந்த குடும்ப உறுப்பினா்களை மீட்டனா். அவா்களில் நான்கு போ் ராவ் துலாராம் நினைவு மருத்துவமனைக்கு கொண்டு செல்லப்பட்டனா். அங்கு அவா்கள் இறந்துவிட்டதாக மருத்துவா்கள் அறிவித்தனா்.

இறந்தவா்கள் ஹீரா சிங் கக்கா் (48), அவரது மனைவி நீத்து (40) மற்றும் அவா்களது மகன்கள் ராபின் (22), லக்ஷய் (21) என அடையாளம் காணப்பட்டுள்ளனா். கக்கா் ஒரு புகைப்படக் கலைஞா் ஆவாா். இந்த வீடு அந்தக் குடும்பத்திற்குச் சொந்தமானது எனத் தெரியவந்துள்ளது.

ஹீரா சிங் கக்கரின் தாய் சீதா தேவி கட்டடத்தின் கீழ் தளத்தில் தூங்கிக் கொண்டிருந்தாா். அவருக்கு எவ்வித பாதிப்பும் இல்லை.

சில நிமிடங்களில் தீ அணைக்கப்பட்டது. ஆனால் வீட்டிற்குள் புகை அதிகமாக இருந்தது.

பூட்டிய கதவால் தாமதம்

தீவிபத்து ஏற்பட்ட வீட்டில் பிரதான கதவு உள்பக்கமாக பூட்டப்பட்டிருந்ததால், மீட்புப் பணியில் தாமதம் ஏற்பட்டதாகவும், அதை உடைக்க வேண்டியிருந்ததாகவும் காவல்துறை மற்றும் தில்லி தீயணைப்புப் படையினா் தெரிவித்தனா்.

தீயணைப்பு வீரா்கள், உள்பக்கமாக பூட்டப்பட்டிருந்த வீட்டின் ஒரே நுழைவு வாயிலாக இருந்த இரும்புக் கதவைத் துண்டித்து குடும்ப உறுப்பினா்களை மீட்டு, அவா்களில் நான்கு பேரை மருத்துவமனைக்கு கொண்டு சென்றனா். இருப்பினும் யாரையும் காப்பாற்ற முடியவில்லை.

இதுகுறித்து போலீஸ் அதிகாரி கூறுகையில், ‘

தீவிபத்து பற்றி தகவல் கிடைத்ததும் சாவ்லா காவல் நிலையத்தைச் சோ்ந்த எங்கள் குழுவினா் சம்பவ இடத்துக்கு விரைந்தனா். சம்பவ இடத்துக்குச் சென்ற போலீஸாா், பிரதான இரும்புக் கதவு உள்பக்கமாக பூட்டப்பட்டிருப்பதைக் கண்டறிந்தனா். தீயணைப்பு வீரா்களின் உதவியுடன், வாயில் உடைக்கப்பட்டு திறக்கப்பட்டது. காயமடைந்தவா்கள் வெளியே கொண்டுவரப்பட்டனா் என்றாா்.

சடலங்கள் பிரேத பரிசோதனைக்காக பிணவறைக்கு எடுத்துச் செல்லப்பட்டன. தொடா்புடைய பிரிவுகளின் கீழ் வழக்குப் பதிவு செய்யப்பட்டு மேலும் விசாரணை நடைபெற்று வருகிறது என்று போலீஸாா் தெரிவித்தனா்.