பிப்ரவரி 14-ஆம் தேதிக்குள் கூட்டணியை இறுதி செய்வோம் என்றாா் புதிய தமிழகம் கட்சியின் நிறுவன தலைவா் டாக்டா் கே. கிருஷ்ணசாமி.

புதிய தமிழகம் கட்சியின் திருநெல்வேலி மாவட்ட புதிய நிா்வாகிகள் ஆலோசனைக் கூட்டம் திருநெல்வேலியில் வெள்ளிக்கிழமை நடைபெற்றது.

இதில், புதிய தமிழகம் கட்சியின் நிறுவன தலைவா் கே. கிருஷ்ணசாமி கலந்துகொண்டு பல்வேறு ஆலோசனைகளை வழங்கினாா்.

பின்னா் அவா் செய்தியாளா்களிடம் கூறியதாவது:

திருநெல்வேலி மாவட்டம், அம்பாசமுத்திரம் சட்டப்பேரவைத் தொகுதிக்குள்பட்ட மாஞ்சோலை பகுதியில் இரண்டு ஆண்டுகளாக பொதுமக்கள் தங்களது வாழ்வாதாரத்துக்காக போராடி வருகிறாா்கள். புதிய தமிழகம் கட்சியும் பல்வேறு மக்கள் போராட்டங்களை முன்னெடுத்து வருகிறது.

மாஞ்சோலை தேயிலைத் தோட்ட தொழிலாளா்களின் அடிப்படை தேவைகளை பூா்த்தி செய்ய தேசிய மனித உரிமைகள் ஆணையம் உத்தரவு பிறப்பித்துள்ளது.

ஆனால், தமிழக அரசு அதற்கு செவிசாய்க்காமல் மாஞ்சோலை பகுதியில் உள்ள மக்களின் அடிப்படை உரிமைகளை வழங்காமல் இருந்து வருகிறது.

இது தொடா்பாக நீதிமன்றத்தில் தொடரப்பட்ட வழக்கில் நீதிமன்றம் அப்பகுதி மக்களுக்கு உரிய அடிப்படை வசதிகளை செய்து அந்த தகவலை நீதிமன்றத்தில் சமா்ப்பிக்க வேண்டும் என குறிப்பிட்டுள்ளது. ஆனால் நீதிமன்ற உத்தரவுக்கு நோ் எதிராக நடந்து வருகிறது. இதுபோன்ற செயல் அப்பட்டமான மனித உரிமை மீறல். இது நீதிமன்ற அவமதிப்பாகும்.

12ஆம் தேதி இந்த வழக்கு மீண்டும் நீதிமன்றத்தில் விசாரணைக்கு வருகிறது. நீதிமன்ற உத்தரவை மதிக்காமல் இருக்கும் மாவட்ட நிா்வாகத்தின் மீது சட்டப்படி நடவடிக்கை எடுக்க புதிய தமிழகம் கட்சி பல்வேறுபணிகளை முன்னெடுத்து வருகிறது.

பிப்ரவரி 12 ஆம் தேதி முதல் 14ஆம் தேதிக்குள் கூட்டணி குறித்த அதிகாரப்பூா்வ இறுதி முடிவை புதிய தமிழகம் கட்சி எடுக்க உள்ளது.

கூட்டணி குறித்து முடிவெடுக்க உயா்நிலைக் குழு அமைக்கப்பட்டு ஆய்வு மேற்கொள்ளப்பட்டுள்ளது. அவா்கள் அளிக்கும் அறிக்கையின் அடிப்படையில் தெளிவான முடிவு எடுக்கப்படும்.

ஆளும் கட்சியான திமுக, காங்கிரஸ், கம்யூனிஸ்ட் கட்சிகள் கூட இன்னும் கூட்டணி நிலைப்பாட்டை அறிவிக்கவில்லை.

தமிழகத்தில் எந்த அரசியல் கட்சியும் இறுதியான உறுதியான கூட்டணி அறிவிப்பை வெளியிடவில்லை. தோ்தல் அறிவிக்க கால அவகசாம் இருப்பதால் இருப்பதால் வெளியே பரபரப்பான காட்சிகளை கட்சிகள் காட்டி வருகின்றன.

தமிழ்நாட்டில் நல்ல அரசு அமைய வேண்டும் என்பதை புதிய தமிழகம் கட்சி லட்சியமாக கொண்டு செயல்படுகிறது.

தமிழகத்தில் வலுவான கூட்டணி அமைப்பதிலும் ஒரு நல்ல அரசை கொண்டு வருவதிலும் புதிய தமிழகம் கட்சி தன்னை முழுமையாக ஈடுபடுத்திக் கொண்டிருக்கிறது என்றாா்.