குளச்சலில் 1,500 கிலோரேஷன் அரிசி பறிமுதல்

 குளச்சலில், கேரள மாநிலத்துக்கு கடத்துவதற்காக பதுக்கி வைக்கப்பட்டிருந்த 1,500 கிலோ ரேஷன் அரிசி பறிமுதல் செய்யப்பட்டது.

குளச்சல் காவல் உதவி ஆய்வாளா் சணல்குமாா் தலைமையில் போலீஸாா் புதன்கிழமை இரவு ரோந்து பணியில் ஈடுபட்டிருந்தனா். அப்போது சைமன்காலனி அருகே ரேஷன் அரிசி மூட்டை, மூட்டையாக அடுக்கி வைக்கப்பட்டிருந்தது. போலீஸாா் அதை கைப்பற்றி காவல் நிலையத்துக்கு கொண்டுவந்தனா். இதில் 1,500 கிலோ அரிசி இருந்தது.

விசாரணையில், இந்த அரிசி மூட்டைகள், கேரள மாநிலத்துக்கு கடத்துவதற்காக பதுக்கி வைக்கப்பட்டிருந்தது தெரியவந்தது.

ரேஷன் அரிசி மூட்டைகளை பதுக்கி வைத்திருந்தது யாா் என்பது குறித்து போலீஸாா் விசாரித்து வருகின்றனா்.