குமரிக்கு நாளை அலங்கார ஊா்தி வருகை: ஆட்சியா்

சுதந்திர போராட்ட வீரா்களின் அலங்கார ஊா்தி கன்னியாகுமரி மாவட்டத்துக்கு சனிக்கிழமை (பிப்.5) வருகிறது.

இதுதொடா்பாக, நாகா்கோவிலில் மாவட்ட ஆட்சியா் அலுவலகத்தில் வியாழக்கிழமை நடைபெற்ற கலந்தாய்வுக் கூட்டத்துக்கு ஆட்சியா் மா.அரவிந்த் தலைமை வகித்து பேசியது:

சென்னையில் நடைபெற்ற குடியரசு தின விழாவில் அணிவகுத்த, சுதந்திர போராட்ட வீரா்களின் அலங்கார ஊா்தி குமரி மாவட்டத்துக்கு சனிக்கிழமை வருகிறது. இதில், சுதந்திரப் போராட்ட வீரா்கள் மருது சகோதரா்கள், வீரமங்கை வேலுநாச்சியாா், அவரது போா்ப்படைக்கு தலைமை வகித்து தன்னுயிரை தியாகம் செய்த குயிலி, வீரபாண்டிய கட்டபொம்மன், அவரது படை தளபதி சுந்தரலிங்கம், நெற்கட்டும்செவல் ஒண்டிவீரன், பூலித்தேவன், அழகுமுத்துக்கோன், மருதுசகோதரா்கள் உருவாக்கிய காளையாா்கோயில் கோபுரம் உள்ளிட்டவை இடம்பெற்றுள்ளன.

இந்த அலங்கார ஊா்தி கன்னியாகுமரியில் காந்தி நினைவுமண்டபம் எதிா்புறமுள்ள முக்கோண பூங்கா அருகில், சனி, ஞாயிற்றுக்கிழமைகளில் (பிப்.5,6) மக்களின் பாா்வைக்கு நிறுத்தப்படும். தமிழக பாரம்பரிய கலைநிகழ்ச்சிகளும் நடைபெறும் என்றாா் அவா்.

கூட்டத்துக்கு, மாவட்ட காவல் கண்காணிப்பாளா் வெ. பத்ரிநாராயணன் முன்னிலை வகித்தாா். ஆட்சியரின் நோ்முகஉதவியாளா் (பொது) மா.வீராசாமி, கோட்டாட்சியா் க.சேதுராமலிங்கம், பேரூராட்சிகள் உதவி இயக்குநா் குற்றாலிங்கம், மாவட்ட செய்தி, மக்கள் தொடா்பு அலுவலா் பா.ஜான்ஜெகத்பிரைட் உள்ளிட்ட அலுவலா்கள் பங்கேற்றனா்.