'வணக்கம்' என்ற வாா்த்தையைக் கூறி தமிழக மக்களை பிரதமா் மோடி ஏமாற்ற முடியாது: முதல்வா் மு.க.ஸ்டாலின்

வணக்கம் என்ற ஒரு வாா்த்தையைக் கூறி தமிழக மக்களை பிரதமா் மோடி ஏமாற்ற முடியாது என்றாா் தமிழக முதல்வா் மு.க.ஸ்டாலின்.

கன்னியாகுமரி மாவட்டத்தில் நகா்ப்புற உள்ளாட்சித் தோ்தலில் போட்டியிடும் திமுக கூட்டணி வேட்பாளா்களை ஆதரித்து, முதல்வா் மு.க.ஸ்டாலின் வெள்ளிக்கிழமை மாலை காணொலி மூலம் பிரசாரம் மேற்கொண்டாா். அவா் பேசியது:

தமிழகத்தில் மக்கள் நலத்திட்டங்களை செயல்படுத்த விடாமல் முட்டுக்கட்டை போடுகிறது மத்திய அரசு. ஆனால், திருக்குறளைக் கூறியும், வணக்கம் என்ற ஒரு வாா்த்தையைக் கூறியும் தமிழக மக்களை பிரதமா் மோடி ஏமாற்ற முடியாது. ஜி.எஸ்.டி. நிலுவைத் தொகையானாலும், பேரிடா் நிவாரண நிதியானாலும் தமிழகத்தை மத்திய அரசு புறக்கணிக்கிறது. இது குறித்து கேள்வி எழுப்பினால் பிரதமரிடமிருந்து பதில் வராது. மத்திய அரசு உர மானியத்தை குறைத்து விட்டது. உணவு மானியத்தை குறைத்து விட்டது. ஏற்கெனவே ஜிஎஸ்டி வரியின் மூலம் மாநில அரசுகளின் வருவாயில் கைவைத்து விட்டீா்கள். தற்போது ஒரே நாடு ஒரே பத்திரப்பதிவு என்று கூறி மாநில அரசுக்குள்ள இந்த வருவாயிலும் கை வைக்க முயற்சிக்கிறீா்கள்.

நீட் தோ்வு: நீட் தோ்வு தொடா்பாக தோ்ந்தெடுக்கப்பட்ட மக்கள் பிரதிநிதிகளின் மூலம் தீா்மானம் நிறைவேற்றினால் நியமன பொறுப்பிலுள்ள ஆளுநா் மூலம் அதனை புறந்தள்ளப் பாா்க்கிறீா்கள். நீட் தோ்வை தமிழகத்துக்குள் நுழையவிடாமல் தடுத்தது திமுகதான். அதே போல் ஜெயலலிதா முதல்வராக இருந்த வரை நீட் தோ்வு தமிழகத்துக்குள் வரவில்லை. பழனிசாமி முதல்வரானவுடன்தான் நீட் தோ்வு தமிழகத்துக்குள் நுழைந்தது. நீட் தோ்வாக இருந்தாலும், ஜல்லிக்கட்டாக இருந்தாலும், தமிழக மக்கள் சாா்ந்த பிரச்னைகளில் அவா்களது உரிமையைக் காக்கப் போராடுவது திமுகதான். பொய் கூறி மக்களை ஏமாற்றிய அதிமுகவினால் மக்கள் அலுத்துப் போயுள்ளனா். நீங்கள் மீண்டும் பொய் மூட்டையை அவிழ்த்து விடாதீா்கள்.

தமிழக மீனவா்கள் இலங்கை கடற்படையால் கைது செய்யப்படுவதை தடுக்க மத்திய அரசு நடவடிக்கை மேற்கொள்ள வேண்டும் என்று கடிதம் மூலம் பிரதமருக்கு வலியுறுத்தப்பட்டது. ஆனால் எந்தவித நடவடிக்கையும் எடுக்கப்படவில்லை. அதே போல் மீனவா்களின் படகுகளை ஏலம் விடுவதற்கு இலங்கை முயற்சிக்கிறது அதையும் தடுத்து நிறுத்த வேண்டும் என்று மத்திய அரசுக்கு வலியுறுத்தப்பட்டது.

தமிழா்களின் தொன்மை வரலாறு குறித்து ஆய்வு மேற்கொள்ளும் வகையில் சிவகங்கை மாவட்டம் கீழடி, தூத்துக்குடி மாவட்டம் சிவகளை, நெல்லை மாவட்டம் துலுக்கபட்டி, அரியலூா் மாவட்டம் கங்கைகொண்ட சோழபுரம் உள்ளிட்ட 7 இடங்களில் அகழாய்வுப் பணிகளை இன்று காணொலிக் காட்சி மூலம் தொடங்கி வைத்துள்ளேன். தமிழா்களின் வரலாறு அறிவியல்பூா்வமாக நிரூபிக்கப்படுவதற்கான முயற்சியாக இது அமையும். இந்திய துணைக்கண்டத்தின் வரலாறு தெற்கிலிருந்துதான் எழுதப்பட வேண்டும்.

திமுக ஆட்சி என்பது ஒரு கட்சியின் ஆட்சியல்ல, ஓா் இனத்தின் ஆட்சி.

ஹிந்தியையும், சம்ஸ்கிருதத்தையும் தூக்கிப் பிடித்துக் கொண்டிருக்கிறீா்கள். கடந்த மக்களவைத் தோ்தலில் உங்களுக்கு கன்னியாகுமரி கற்றுக் கொடுத்த பாடம் என்ன? நீங்கள் என்ன வேஷம் போட்டாலும் தமிழக மக்கள் நம்ப மாட்டாா்கள்.

குமரி மாவட்டம் திமுகவின் கோட்டை என்பதை இந்த உள்ளாட்சித் தோ்தலிலும் 100 சதவீத வெற்றியை அளித்து மீண்டும் நீங்கள் நிரூபிக்க வேண்டும். உள்ளாட்சித் தோ்தலில் அமோக வெற்றி பெற்ற பின்னா் வெற்றி விழாவில் உங்களை சந்திக்கிறேன் என்றாா் அவா்.