ஆலங்குளம் அருகே அரசு ஆரம்ப சுகாதார நிலையத்துக்குள் புகுந்து கையடக்க மடிக்கணினியைத் திருடிய 4 பேரை போலீஸார் கைது செய்தனர்.
ஆலங்குளம் அருகேயுள்ள கரும்பனூரில் உள்ள அரசு ஆரம்ப சுகாதார நிலையத்தில் பயனாளிகளின் விவரங்கள் குறித்து பயன்படுத்தும் பொருட்டு செவிலியர்களுக்கு அரசு கையடக்க கணினி (டேப்) வழங்கியுள்ளது. இதில் கர்ப்பிணிகள் குறித்த தகவல்கள் சேமித்து வைக்கப்பட்டிருந்தனவாம். 
இந்நிலையில் சில நாள்களுக்கு முன்பு இந்த கையடக்க கணினியை காணவில்லையாம்.  இதுகுறித்து ஆலங்குளம் போலீஸார் வழக்குப் பதிந்து விசாரித்து வந்தனர். இந்நிலையில், வெள்ளிக்கிழமை ஆலங்குளம் பேருந்து நிலையம் அருகே சந்தேகத்துக்கிடமாக நின்றிருந்த 4 பேரை பிடித்து போலீஸார் விசாரித்ததில்,
அவர்கள் கரும்பனூரைச் சேர்ந்த 17 வயது சிறுவன் மற்றும் காளத்திமடம்  ராஜேந்திரன் மகன் ராமதாஸ் (24), சீனி காளை மகன் அசோக் (34), நல்லூர் வேலாயுதம் மகன் வைத்திலிங்கம் (32) ஆகியோர் என்பதும்,  இவர்கள்தான் கையடக்க கணினியைத் திருடியவர்கள் என்பதும் தெரியவந்தது. அவர்களிடமிருந்து கையடக்க கணினியை பறிமுதல் செய்த போலீஸார், 4 பேரையும் கைது செய்து ஆலங்குளம் நீதிமன்றத்தில் ஆஜர்படுத்தினர்.