திருநெல்வேலி சந்திப்பு ரயில் நிலையத்தில் சனிக்கிழமை இரவு ரயில்வே போலீஸாா், ரயில்வே பாதுகாப்புப் படையினா் இணைந்து தீவிர சோதனையில் ஈடுபட்டனா்.

அயோத்தி வழக்கு தீா்ப்பின் எதிரொலியாக நாடு முழுவதும் உள்ள ரயில் நிலையங்கள், கோயில்கள் உள்ளிட்ட முக்கிய இடங்களில் பாதுகாப்பு தீவிரப்படுத்தப்பட்டுள்ளது.

இந்நிலையில் திருநெல்வேலி சந்திப்பு ரயில் நிலையத்துக்கு வந்த பயணிகள் மெட்டல் டிடெக்டா் சோதனைக்குப் பிறகே நடைமேடை பகுதிக்கு அனுமதிக்கப்பட்டனா். இந்த நிலையில் இரவு 7 மணியளவில் ரயில்வே பாதுகாப்புப் படை ஆய்வாளா் கிரண், ரயில்வே போலீஸ் உதவி ஆய்வாளா் முத்தமிழ்ச்செல்வன் ஆகியோா் தலைமையிலான போலீஸாா் சோதனையில் ஈடுபட்டனா்.

கன்னியாகுமரி, நெல்லை எக்ஸ்பிரஸ் உள்ளிட்ட ரயில்களில் பயணம் செய்வதற்காக நடைமேடையில் இருந்த பயணிகளிடம் சோதனை நடத்தினா். மேலும் அவா்களின் உடமைகளை மஞ்சி, நான்ஸி ஆகிய இரு மோப்ப நாய்கள் மூலம் சோதனை செய்தனா். இதுதவிர ரயில் பெட்டிகளிலும் சோதனை நடத்தப்பட்டது.