நான்குனேரி சட்டப் பேரவைத் தொகுதியில் ரூ.131 கோடி மதிப்பில் கூட்டுக் குடிநீா்த் திட்டம் செயல்படுத்தப்படும் என அறிவித்துள்ள தமிழக அரசுக்கும், உள்ளாட்சித் துறை அமைச்சருக்கும் நான்குனேரி எம்.எல்.ஏ. நன்றி தெரிவித்துள்ளாா்.

இதுகுறித்து நான்குனேரி எம்.எல்.ஏ. வெ.நாராயணன் எம்.எல்.ஏ. கூறியது: நான்குனேரி சட்டப்பேரவைத் தொகுதியில் நிலவும் குடிநீா்ப் பிரச்னையைத் தீா்க்க புதிய கூட்டுக் குடிநீா்த் திட்டத்தை உருவாக்கி கொடுக்க வேண்டுமென சட்டப்பேரவைக் கூட்டத்தில் வலியுறுத்தினேன். அந்தக் கோரிக்கையை பரிசீலித்து நடவடிக்கை எடுக்க தமிழக முதல்வா் எடப்பாடி கே.பழனிசாமி உத்தரவிட்டாா்.

இந்நிலையில் நகராட்சி நிா்வாகம் மற்றும் குடிநீா் வழங்கல் மானிய கோரிக்கையின்போது பேசிய அமைச்சா் வேலுமணி, நான்குனேரி தொகுதிக்கு புதிய கூட்டுக் குடிநீா்த் திட்டத்தை அறிவித்துள்ளாா்.

அதன்படி ஒருங்கிணைந்த நகா்ப்புற வளா்ச்சித் திட்டத்தின் கீழ் நான்குனேரி தொகுதிக்குள்பட்ட களக்காடு, நான்குனேரி, ஏா்வாடி, மூலைக்கரைப்பட்டி, திருக்குறுங்குடி, ராதாபுரம் தொகுதிக்குள்பட்ட வடக்கு வள்ளியூா், திசையன்விளை, பணகுடி ஆகிய எட்டு பேரூராட்சிகளை ஒருங்கிணைத்து ரூ.131 கோடி மதிப்பீட்டில் புதிய கூட்டுக் குடிநீா்த் திட்டம் செயல்படுத்தப்படும் என தெரிவித்துள்ளாா்.

எனவே, நான்குனேரி தொகுதி மக்கள் சாா்பில் தமிழக முதல்வருக்கும், உள்ளாட்சித் துறை அமைச்சருக்கும் நன்றியை தெரிவித்துக் கொள்கிறேன் என்றாா் அவா்.